Dreum
Doar aan aanderkaant van t knoal
met zien zwaarde wotter en geboar
doar mos e hin met zien verhoal
over bedoeïenen en olle trafo’s
en de zin van t bestoan
over n smaal droad luip e over
schippersvraauw luit hom begoan
zwaiterg kwam e aan bie roustege spieker
woar e jaas op hangen kon
en luit zich zakken ien kring
van grieze boarden en vraauwen ien japon
zun scheen hier en der waas meziek
elkenain waas hier n beetje liek
en toun dee e zien verhoal
nait over trafo’s of bedoeïenen
mor over oksters en zeldzoam vlakglas
en hai ston der bie te grienen
noakend ging e deur, klok sluig aal vief
en ging dat aine wief met heur dikke titten
zomor bovenop hom zitten
toun wer e wakker op baank
en televisie ston nog aan
