Domme kou
n Glènrooie zunne verschient aan de kim
Verspraait langzoam zien licht over t waailand
Woar in dunne opstiegende dook
n Koppel koien herkaauwend ligt in t zaand
t Is ja n aibels mooi gezicht
Zoas dat deur n ander ligt en lopt
Kleur en ras dat moakt ja nait oet
Roodbonte kou of grunneger bloarkop
Zai eten aalmoal tzulfde gruine gras
En geven aalmoal zulfde widde melk
Der is in dat koppel genaine de boas
Ze binnen aal geliek en dat geldt veur elk
Zai kriegen gain roezie om t geleuf
Van laigen en stelen hebben zai gain hinder
En zai hebben ook gain last van drugs
Ze binnen laif en goud veur heur kinder
Was dat in t mìnsdom nou ook mor ais zo
En gaven wie ons fouten nou mor tou
Dìn kon je in de wereld veul beter wezen
Wel is nou dommer wie of dai kou?
