De Gebroeders van Dam (dail 30)

Vervolgverhoal, schreven deur Gerhard Tuinema.

Ol Meer het ter nait veul zin aan en Jurrie mout hom aalgedureg n beetje aanpittjen aans komt e haildail nait veuroet.
Stoer het e t aans nait, want t is lichte grond en ploug glidt ter makkelk deur. t Vaalt Jurrie ook nait tou, want hai is t boerenwaark nait meer wènd. Hai het t zwait veur de kop stoan en aalgedureg mout e even poesten. n Daimd of wat staait nog op stoppel en dat mout neudeg om, veur vorst invaalt.

t Lopt Jurrie ook niks mit. t Duurt mit Elzo laanger as verwachten was, omreden wond nait best weer dicht wil. Hai is al n moal of wat mit dat nije goud inspoten en doar is t nait minder van worden. Hennie gaait mainstied even noar hom tou want Jurrie kin nait best vot. t Waark op ploats mout ook deurgoan en doar is leste tied nait veul aan doan.

Knotnerus het hom al n dag of wat hulpen, mor dat luip ook spoak op n duur. Ze kinnen gain vree hollen. Ol boer mag geern wat nittjen en doar kin Jurrie min tegen. t Is zo ver kommen dat e boer mit kwoaje kop wegstuurd het en nou staait e der weer allain veur.

Sambo komt ook aalgedureg ais kieken mor dij paast wel op dat e gain voele handen krigt. Dij kin der mit zien vodden en zowat hin wel kommen en woarom zel e zok t din drok moaken. t Weer is der de leste doagen nait beter op worden. t Is ale doagen regen en mainste oavends komt Jurrie deurnat van t laand.

Mainstied moakt ze zok din mor n beetje stoetenbrij kloar, want t is hom ainlieks teveul waark om eten te koken.
Nee, het vaalt nou tou as je der hailemoal allain veur stoan. Vot toch peerd, vot din toch! t Peerd krigt weer n klets mit lien, mor veul helpt t nait. t Is net of ol Meer aanvuilt dat ter n aander achter hom lopt, want mit Elzo ging t altied oareg nuver, alhouwel nait haard.

Donderkoater nog aan tou, vot toch peerd. Ik zeg: vot toch!
Hai man, wat zetten ie ter ja bie!
Ho! Dat huift Jurrie mor ainmoal te zeggen, want doar wil t peerd wel noar lustern.
Jurrie kikt ais achterom wel der nou weer is. Hai het nait vernomen dat ter ain achteroet kommen is.
Gommes doagen Bosker, binnen ie doar? Is der wat bizunders? Jô, der is net opbeld oet stad. Ie kinnen bruier mörn weerhoalen, mor t was t beste zeden ze dat ie mit auto kwammen, want Elzo mout nog n beetje kaalm aan.

Nou, din wô je bedankt veur bosschop. Bin k joe nog wat schuldeg?
Nee man, da s wel in orde. Mor vertel mie ais van Dam, wanneer goan ie ainlieks traauwen. d Ain zegt dit en d aander dat, mor t rechte wordt men nait gewoar. En dou k hier hinmos docht ik: nou zè k van Dam zulf ais vroagen, want aal dat getwaauwel van n aander wor k ook zat van. Nait dat k nijsgiereg bin, mor nou der toch over proat wordt, wi k ook geern t rechte van de zoak waiten. Ie kriegen n hail schier wiefke heb k heurd? Sambo haar ter in t scheerhoes over en dij snaarde der nog al wat van.

Kiek ais Bosker, k wol der ainlieks nait over proaten, mor nou ie mie zo op de man of vroagen mag k mie nait stil hollen. Wanneer ik traauwen goa wai k zulf nog nait, mor hail laank zel t wel nait meer duren. Zo gaauw as Elzo weer n beetje baineg is goan wie onder de geboden en din zel t ook gaauw wezen.

Zo, zo, zo! zegt Bosker, zo gaauw al. Och, t is beste ook mor van Dam. n Hoesholn zunder vraauw is niks, dat zeg k mit joe. Mor as k eerlek wezen mag, k haar t toch nait achter joe zöcht. t Is n hail oaventuur en dat is t. Mor komaan, k zel zörgen da k weer bie de vraauw kom, k heb mie al te laank ophollen onderwegens. Dus, din hoalen joe joen bruier mörn wel weer nè?

Dat komt wel goud Bosker en van haarten bedankt hur!
Doar nait veur van Dam, t was mor n klaine muite. Nou, eerst gegroet en beterschop mit joen bruier.
Eh Bosker, wacht nog even! Zollen ie nog wel even n bosschop veur mie doun willen in t loug? Ie kommen der toch langs en ik mout ter n apaarte raais om moaken.

Zeker wel man, zeg mor wat ter te doun is.
Rie even bie timmerman Mulder en vaarver Blaauw langs en vroag heur of z even bie mie kommen willen. t Spul mout hier onder handen nomen worden.
t Komt dik in orde van Dam, k zel bosschop doalek overbrengen.
Jurrie bedankt hom nog ais weer en din stapt Bosker op.

Zo ol, nou vot mor weer. Tou toch peerd, vot din toch! Ol Meer zet zok schrap en doar gaait weer hin.

Wordt vervolgd!