De Gebroeders van Dam (dail 23)

Vervolgverhoal, schreven deur Gerhard Tuinema.

En, zegt Knotnerus, hou was t mit bruier? Och kerel, nait best ducht mie, zichst ter ja zo vergeven oet! Haar e slim pien? Tou toch kerel, zeg toch ais wat. k Bin ja glin nijsgiereg!
Jurrie is net weer thoeskommen, mor hai is vanzulf nait hail bliede. Eh… hou main ie? Oh eh… Elzo? Nee, dat leek hail best. Nog wel wat pien, mor hai was toch goud monter. Dat lopt wel lös dunkt mie. En hou is t hier goan? k Bin joe slim dankboar dat ie zo goud veur de boudel zörgd hemmen.

Jô kiek es Jurrie, zegt Knotnerus, k wil mie der nait mit bemuien, mor as ol boer gaait mie t wel aan t haart dat ie de boudel zo omkommen loaten. Der ligt gain ding op stee en alles is even hoaveloos. Verdikkemie, ie as fikse kerels, ie maggen joe wat schoamen en dat mag je. Group zit nog haalf vol van vleden joar en t zwienhok is mit recht n zwienhok. Kerel nog aantou, k wis nait wa k zag.
Eh… doar hemmen ie wel geliek aan Knotnerus, mor dat komt ook dat Elzo nou in t zaikenhoes ligt. Och loop hin man, dij s net n dag vot. Nee, doar zit t nait in. Ie pakken de boudel verkeerd aan. Doe most mit over t laand en n vrouw veur hoeshollen. Mor dat zel nou wel aans worden. Ha, ha, ha, dij Jurrie! Hoalt mie der nog zo’n jonk wiefke oet. Man, k bin ja glad jaloers op die. Doar wol ik mien olle bonken nog wel bie waarmen. Leuf mor jong dat dij ofschient! t Zel hier nou wel evangelie worden. t Kin hier nog wel n modelboerderij worden, der! Mor net as ik zee, t wordt ook tied. Wa k zeggen wol, hou was t mit t wiefke? Bist ter vast nog wel even hinwest. Ha, ha, ha, hest nog even n doetje had? Ze smokt vast best nè? Tou dreuge, zeg toch ais wat. Man, as ik in dien stee ston dee k vlaag oet!

Knotnerus het t leste der oet veur e in de goaten het wat e ainlieks zegd het. Dat was ook gain mooi zeggen nou Elzo in t zaikenhoes ligt. Mor Knotnerus zit vanzulf vol van dij vrijerij van Jurrie. Dat is ja net wat veur ol boas. Nijskes binnen der toch mor betuun en op zokswat kin e weer n dag of wat teren.
Neem mie nait kwoalek, Jurrie, mor zo heb k dat nait maind, dat begripst wel. Mor nou in eerns, wanneer mout traauwerij wezen? Zeker doalek as Elzo weer thoes is nè? k Zol mor nait te laank wachten jong, ze kin zok nog ais weer bedenken.

Din krigt Knotnerus in de goaten dat Jurrie hom aal nait aanheurt, teminzen doar het t wel wat van. Hai kikt mor wat sloareg veur zok oet en t is ja net of e zok in n dag of drij nait wossen het, zo graauw en ellendeg kikt e oet.
Eh… ie worden bedankt, zegt Jurrie nog n moal en mit lopt e vot. Ol boer schudkopt ais. Dàt is de dank as ie ain tou de drek oethelpen. Mor ze kinnen d’r in as ze n koatje hemmen. Hai brandt zien vingers der nait weer aan…

Knotnerus is nog mor naauw vot as der n stoomfiets loan op komt. De knalpiep staait wied open en t heuren en zain vergaait joe glad, zò knittert dat ding over zandloan. Hai hobbelt deur de koelen, mor t dut aal niks of. Sambo is nait benaauwd. As dij op zien Indian zit het e gain kui of mui. Mit n grode draai komt e t haim op en even loater staait t gevoarte stil.

Sambo trekt klep van pet nog n beetje daiper in ogen, schraabt zien keel ais goud en din lopt e deur t achterhoes noar koamer. Hai vindt Jurrie in zien ol zörg, net n bultje ielenne.
Mien gommes Jurrie, wat krieve nou! Man nog aan tou, wat mekaaiert die wel. Kost in n dag of drij wel nait achteroet west hemmen, zò min kikst ja oet. Mor vertel mie ais, hou is t mit bruier? Hemmen ze t mes der al in had? Kerel, wat zel e piept hemmen!
Och, wat ze k zeggen, hai was goud monter, mor vanzulf nog n bult pien. Mor k reken wel dat t wel löslopt.

Hest taande nog zain Jurrie? Ze kwam bie mie aan, nait best. Ze foeterde en dee, net of ik t helpen kon. Mie dunkt jong, doar lopt nog wel bloud oet, want as dij olle sekreet t op zin het kin ze maal goud opgeven.
Der is al bloud oetlopen, zegt Jurrie sneu. Ze het Hennie veur alles wat mor lelk was oetmoakt en dij wos nait meer wat ze d’r aan haar. Ze duurt ter nait meer op aan Sambo, ze het mie de koop opzegd. t Is doan, hailemoal doan! Man, ik ben der kepot van! Alles komt ook bie mekoar. Eerst dij zaikte van Elzo en nou dit weer. k Mos der nooit aan begonnen wezen Sambo jong, dat kon nooit goud goan. n Man op mien leeftied mout nait meer over vraauwluu prakkezaaiern, benoam nait over n jonk wiefke. Mor t muit mie, hail bot slim.

Wat zegstoe doar? Het ze die de koop opzegd? Doar leuf k gain spier van. Doar mout wat achter zitten. Vertel mie ais, wat is der ainlieks veurvalen. Wat het t ol mins zegd dat Hennie zok doar zoveul van aantrekken kon.
Jurrie legt hom zo goud en kwoad as dat gaait oet wat ter gebeurd is en wat Hennie en hai beproat hemmen.
Sambo let hom stil oetproaten en as Jurrie opholt, het Sambo zien plan al weer kloar.

Doar mout ik wel even maank Jurrie, veur dat ter nog meer brokken kommen. Hennie is wat overspannen west, aans haar ze zokswat nait zegt.
Misschien muit heur t al wel… Mor doe waist hou vraauwluu binnen. Ze bieten zok laiver n vinger of instee dat ze tougeven.
Waist wat? Bus in net vot, wie vlaigen even op stoomfiets noar stad. Nee, nou nait tegenproaten, dou nou mor wat ik zeg. Ie binnen verdold net klaine kinder. Kin joe gain wind dwaars zitten of ie zitten al in zak en aaske.
Mor ik zeg mor zo: proat mit Sambo en ie goan noar de haaien!

Zovve doar wel goud aan doun, Sambo? Ze het ja dulek zegd dat t nait langer kon.
Nee Sambo, k wil heur der nait mit ploagen. Loa k mie der mor bie deellegen, zel wel niks aans opzitten.
Nou most t hail gaauw waiten, aans goa ik achter heur tou en din is t binnen drij week bruloft, doar stoa ik die börg veur.
As ze mien mooi en laif gezicht goud bekikt, is ze weg, wat ik die zeg! Tou nou Jan Zeur, trek n jaas aan en din govve vot. Binnen twinteg menuten bivve in stad, want mien Indian lopt as n tuut!

Ik kom nait achter op motor, ropt Jurrie. Man, doe jagstie nog n moal hartstikke dood. En hest ook jenever had, dat kin k wel roeken!
Wezenliek nait Jurrie, k heb mien moterbril schoonmoakt mit spiritus en doar komt dij lucht vandoan. En nou most gaauw waiten: wist vrijwilleg mitgoan en aans bin k die op motor vaast. Der zel en der mout bruloft kommen en dit is de leste kans.

Wordt vervolgd!