De Gebroeders van Dam (dail 10)
Vervolgverhoal, schreven deur Gerhard Tuinema.
Hennie de Boer het gain mooie jeugd had. Dou ze vattien was kwam heur voader oet tied en heur moeke, ze was al nooit staark west, haar dij slag hoast nait droagen kènd en was veur heur tied old worden.
Olluu haarn n beetje geld overspoard, mor toch lang nait genog om der stil van te leven. Eerste joaren ging t nog, mor dou ze achttien was, mos der aans in veurzain worden. Nou konden ze wel noar t Gemaintehoes goan om ondersteunen, mor doar haren moeke en zai nait tou kommen kend.
Moeke haar t naaien opzet en Hennie haar waarkhoezen zöcht. Ze haar knooid en pokkeld en heur mooiste joaren wazzen zo veurbie goan. Gelegenhaid om mit jonges in aanroaken te kommen kreeg ze nait en doar haar ze zok op n duur ook bie deellegd.
Nou, twij joar leden, is heur moeke in n zwoare longontsteken bleven en zo is Hennie allain achterbleven. Stil is t om heur tou worden… Aans kon ze alles nog mit moeke beproaten, mor nou het ze hailemoal gain aansproak meer. Ain dag is geliek aan aander, want as je vaaierndaarteg binnen, hij j as vrouw allain nait veul moud meer om hier of doar noar tou te goan.
Gebrek het ze nait, want ze kin mit heur waarkhoezen makkelk de kost veur zok allain verdainen. Ze het ter wel ais over docht om heur waarkhoezen op te zeggen, mor ze kin der nait best tou kommen. Ze is gain voutveeg zo as n hail bult en ze wordt ook nait as waarkster behandeld.
Mor toch, t voldut heur nait langer. Ze is altied allain en zo het ze der ook al over prakkezaaiert om hoesholster te worden. t Begroot heur din wel dat ze din heur meubels en alles verkopen mout, mor zo is t ook niks. Der komt bie dat ze best kans het dat ze minsen bie zok innemen mout en dat is hailemoal niks. Toch wait ze nait recht wat ze mout…
Din krigt ze de advertentie van Jurrie onder ogen. Eerst leest ze der zo even overhin, mor toch mout ze hom ieder bod even weer overlezen… t loat heur nait mit vree… In de waarkhoezen, woar ze geregeld komt, hemmen ze wel ais tegen heur zegd: Ik vroug n man in kraant, as k die was! Ze het t altied ver votgooid, mor as ze allain was, is ze er wel ais daiper op ingoan.
Per slot van reken was t gain schande. Hou voak las je dij advertenties nait en zai kon wel minsen dij op zo’n manaaier bie mekoar kommen wazzen en dat ging toch meroakel.
Ze haar moud ter nait veur, doar zat hom de kneep. De advertentie onder t nummer speult heur aalvot deur de kop. Wat geft t dat dij man wat older is as zai. As t op stuk van zoaken aankomt, is zai ook gain jonge maaid meer.
En boetendes, n boerderij trekt heur wel aan. Wel schrieven… nait schrieven… jò… nee! n Haalve nacht ligt ze wakker, mor aanderdoags schrift ze n braif en brengt dij ook vot noar bus. De eerste stap is zet…
n Dag of wat noatied komt t antwoord van Sambo en wéér schrift ze n braif. As der twij doagen loater weer n braif van Sambo komt is ze de kluts toch even kwiet. Zel ze hingoan? Nou t zo wied is, zicht ze der as de dood tegen aan. Woar het ze heur verstand had? Wel wait wat veur n kerel dat t is.
t Kin net zo goud n zwendelzoakje wezen. Hou voak las je dat nait in kraant? Weer ligt ze n haalve nacht wakker en as op n duur in sloap vaalt, dreumt ze dat n haile dikke kerel mit n gezicht vol dèllen heur vastholt. Ze wil zok lösrieten, ze ropt en din wordt ze wakker! Aal heur goie veurnemens binnen weg en toch…
Wordt vervolgd!