De Gebroeders van Dam (dail 09)

Vervolgverhoal, schreven deur Gerhard Tuinema.

Postloper Blaauw wait aal nait wat e d’r aan het. t Mag hom nait heugen dat e ooit n braif veur Sambo had het en nou verachtjond al n dag of drij achter mekoar.
Aan de heer A.J.de Lange staait ter ieder bod op t kevort, want zo staait Sambo op t Gemaintehoes inschreven. In t dörp kin men hom aans nait as Sambo, mor vanzulf, dat zet men nait op n braif.
Blaauw prakkezaaiert zok suf wat t wezen kin, want dat t wat bizunders is, staait as n poal boven woater. As t nou om ain braif ging was t nog wat, mor mit dizzen der bie wordt t al wel n stuk of zes, zeuven.

As Blaauw t haim van Sambo opfietst, staait dij hom al in deur op te wachten. Goeimörn Sambo, zegt Blaauw, ik kin t padje hier wel zo’n beetje waarm hollen. Hai trekt zien tas noar veuren, zöcht ter even in om, bekikt braiven nog ais weer en langt din drij over.
Mmmm, k haar docht dat ter nog meer kommen zollen.
Nog méér? Nou wait Blaauw hailemoal nait meer wat e der van denken mout.
Jô, wait ie din nait wat ter te doun is?
Blaauw wol net weer votgoan, mor nou draait e zok nog even weer om. Te doun is? Nee man, k wait naargens van.
Jô kiek, zegt Sambo, k heb mie aanboden as boakerske en dit binnen almoal aanvroagen. Is bepoald veul verlet om.
Blaauw lopt in ainmoal rood aan as e vernemt dat Sambo hom der deurhoalt en mit n glinne kop trekt e of.
Sambo kikt hom lagend achternoa en hai laagt nog as e in zien kroakstoul zit.

Op de advertentie binnen ain’n twinteg braiven kommen, compleet mit pertretten. Jurrie wait ter nog gain spier van, want Sambo het dat zoakje zulf behandeld. n Stuk of wat braiven wazzen van wedevraauwen mit kinder en dij het e zó weerom stuurd. Dat is toch niks veur Jurrie. Wat hom nait goud touleek het e an zied gooid, en zo binnen der noa laank schiften n stuk of zeuven overbleven. Dij het e stuk veur stuk beantwoord en der bieschreven, dat hai allain bemiddeloar is, omreden zien cliënt de kat eerst even oet de boom kieken wil. Hai het nog t ain en t aander vroagd ( vanzulf, hai wil waiten wat veur vlais dat e in de koep het ) en nou Blaauw weer drij braiven brocht het, binnen ale antwoorden binnen.

Zie zo, nou het e van elk n pertret mit twij braiven. Nóú mout Jurrie der mor heer.
Hai ropt n kwoajong van weg of, geft dij n dubbeltje en stuurt hom noar Jurrie tou. Hai mout zeggen dat Jurrie votdoalek kommen mout, der is hoast bie!
Ondertied gaait Sambo tewaark en legt pertretten op n rieg op toavel, mit braiven der onder. Hai vrift zok ais in handen; kerel op peerd, wat het e t zoakje nuver aan de rol.

n Ketaaier loater komt Jurrie t haim oplopen. Hai kikt nait hail bliede, want hai vuilt mit zien lutje toontje wel wat hom te wachten staait. Hai het leste nachten gain wenk in ogen had. Dat e ook nait wiezer west is. Luit e zok deur zo’n halfmaal van n Sambo op riddel joagen. Mor toch… inwendeg denkt e der ook wel ais n beetje aans over. Zo’n jonk wiefke moije ook nait wegpoesten, o zo!
Zo, bister aal, zegt Sambo. Goa zitten jong, din kink van waal steken. Hét neusje van de zaalm! Wat zeg ik? Van de zaalm? Nee, nog fijner! Het beste van het beste. Van achttien tot achtentachteg, mit of zunder kunstgebit! Zwaart, blond, rood, gruin, gries, kist mor in keur goan. Der binnen gounent bie dij gain noagel hemmen om heur dinges te kraben en der binnen poar bie, dij der waarm biezitten. Jurrie jong, het paradies gaait veur die open. Kiek dizze pertretten nou ais. Om der in te bieten, wat zeg ik? Om der raauw in te bieten, dèr! Fenomenaal, à la bakker, zol de dichter wel zeggen. Hierzo, nummer drij! Vaierndaarteg joar, nooit traauw west en n snoetje as n volbloud peerd bie wieze van spreken. Stel die veur dastoe nou zo’n jonk wiefke bie die over vlouer krigst! Wos ter nait kold van! En nou most dizze braif ais bekieken. Wat n mooie haand van schrieven nait? Joa jong, ik heb dat nog nait zo slecht bekeken. Doar komt bruloft van, zowoar as ik Sambo hait, ain grode bruloft. De vlaag komt oet, dèr!
Aarme Jurrie! Hai staait mit ogen te knippern as n koater in mörndaauw. Hai wil wat zeggen, mor Sambo let hom nait aan t woord kommen.

Dij spijt en sputtert en aggewaaiert as n maartkoopman. Jurrie het mit n oogopslag even noar de pertretten keken, mor om eerlijk te wezen: hai duurt nait kieken! Hai is totoal verbalderaaierd! Hai geft zok t’r of en dat dut e! Dat is gain menaaier van doun van n man op zien leeftied. t Is ja net n pittjekeurn, aal dij vrouwluu op n rieg. Mor toch… Aalgedureg kikt e even mit n schaif oog noar nummer drij. Vaierndaarteg joar en nooit traauwd west. Zo ain dag en nacht om hom tou. Stel die dat nou even veur, Jurrie jong. Gain eten koken, gain deel aanvegen, gain bermoaken, niks meer van dat alles. Op tied n schoon hemd aan… Jurrie miemert mor deur en heurt aal nait meer wat Sambo brabbelt. Hai verget alles om zok tou, zo ver is e vot. Hai wil nait kieken, mor dat daarde pertret let hom nait mit vree.
Vaierndaarteg joar, mompelt Jurrie.
Krek zo, vaalt Sambo in. Splinterjonk en n snoetje as ain van achttien. Mor zet alles vot nait op ain peerd, Jurrie. As t niks wordt mit dij, din hest nog n poar achter haand. Dij most ook nait wegpoetsen, jonge, jonge, echte renpittjes! Kiek nou toch ais aan, melk en hunneg, allerlaist mooi speulgoud. Mor waist wat, dij van vaierndarteg schrief ik eerst. Ze mout hier mor ais kommen. t Kin best, as Elzo noar t laand is, wordt gain mins der wat van gewoar. Ik help die wel even op streek en din most dien boontjes zulf mor verder doppen. Huifst ja niks beloven, kist t kaalm aan doun. Wacht mor even, k zel wel even n braifke schrieven.

Of Jurrie wat zegt of nait, t is aal aingoal. Sambo het pin en papier weer veur n dag hoald en schrift n mooie braif. Hai zwut ter van, mor Jurrie zwut nog slimmer. Hai wil der wel of… mor ook wel nait! As e n haalf uur loater weer op hoes aangaait, wait e dat de slag valen is.

Wordt vervolgd!