Dag deur mit Hinnerk

Hinnerk is zesntagnteg joar en woont nog aal op zokzulms in ain luddek aarbaaidershoeske in ’t Loug.

Zo as elke dag is hai um zes uur wakker. Doar ken gain hoane teegn kreijen. Hai schòft zien laange knokege bainen oet ’t nust.

Eevm zitten blievm zodat ’t bloud goud noar de hazzens stroomt veur hai stoan gait, zien striepkoorn boksem aan dut en noar ’t huussie lopt.

Doarnoa nemt hai in de loop ain emmer putwotter met woar hai ain waskelabbe in hangt. Achter in ’t kaarnhoes groetjet hai zok wat oaf bie de geutstaine.

Bie de keukentoavel hangt zien bezoen en trui over ain stoule.

As hai ’t haile spultje aantrokken heft is ’t tied veur ain plak stoede. Hai snit zok ain hompsnee stoede oaf en klaait d’r wat botter op. Hai nemt zok ain blok keeze en mit de keezeriefe bedekt hai zien stoetje d’r mit. Nog ain kopken melk d’r bie en hai ken d’r weer teegnaan.

Dou wui het tied dat hai bie d’ hounderhok kwam. Tuutn mozzen vreeten hebbm en eevm kieken of zai ook legt hebt. Zes hounder en man twij aaier dat is nig te best. Hai zel zien neefke, dai ook tuutn hold, wol vroagen hou dai dat dut zodat ook hai wat meer aaier krigt.

Mits hai weer oet ’t houderhok komt heurt hai ain plof pruddeln. Hai heur ’t al, ’t is de vrijer van zien buurwicht dai d’r weer vandeur gait. Man eer dat dat zowiet is stoan zai eerst nog ain ketaaier op de dam te snoetjeknovveln. JENG JENG zegt d’oal plof en Hinnerk heft ’t beeld d’r bie dat ’t wicht den eevm te griepgroag is bie d’ jong. Hai gniffelt wat den ’t wicht hef ’t nig van ain vrumde. Heur moetje har eerder pezies dezulfde meneuvels. Dai kende de jonges van ’t dörp beter as de dokter en de doomdie.

Hinnerk schoevelde mit zien twij aaier in de buutse weer noar de keuken. In tied dat hai de aaier op ’t aanrecht vleit rappeld de braivmbuzze.

Kraande is d’r. Hinnerk volt de kraande oet op toavel en begunt van veurn oaf aan te leezn. En dat leezn gait nog aal zunder brille, of zo as Hinnerk dat nuimt, ain loertaange. As hai ’t wereldnijs en wel d’r aal stopt bent met rookn leezn heft, wordt ’t tied dat hai op bòsschop gait.

Hai pakt de oale madde, trekt zien jaaze aan en dut de pedde op. Achterdeure op slöt, veurdeure huift hai nig noar te kieken den dai is op slöt kommen dou zien moeke twinteg joar leedn in ain kiste d’r oetdroagen wuir.

Hai pakt zien oale fietse oet de schuure en kikt of de banden nog haard genog bent. Hinnerk slag ’t bain over de zoadel en trapt ’t toenpad oaf. Rechtsoaf en vaar kilometer noar ’t dörp.

Hai gait altied noar ’t winkeltje van Bareld en Gientje. Doar kenst nog gewoon veur de teunbaanke dien bestellns doun en Gientje pakt die dat in de madde. “Wat zel ’t weezn?” vragt Bareld. “Dou mie man ain pond kovvie, twij dreuge worsten, ’n hail witbrood, twij flezzen melk, ain deusken Persil, ain bloksken zaibe en ain kan jenever. Oh joa, dou mie d’r ook nog man zo’n puutken zuutjes bie daist mie twij weeke leedn d’r ook bie doan hest.” Bareld zöcht ’t spul bienkander en schrift ’t op.

Oafreekn dut hai aander weeke wol den is AOW d’r weer. Gientje pakt alles in Hinnerk zien madde.

Dou hai net weer op fietse stappm wol, ruip slager Geert Snorre hom of hai ain ziede spek bie Haarm Garrelds zien Gitje oaflangen wol, doar kwam hai ja toch langes? Hinnerk vleide de ziede spek op pakjedroager, hong de madde aan ’t stuur en zo veurde hai weer noar ’t Loug.

Bie Haarm Garrelds zien Gitje zedde hai de fietse teegn de appelboom en brocht de ziede spek noar de achterdeure. “Volluk!” ruip Hinnerk, “Kom d’r man in as ’t gain jeude is.” heurde hai Gitje roupm. Hinnerk langde ’t spek oaf en Gitje vruig of hai ain kopken kovvie mit heur drinken wol.

Noa de kovvie mit ain plaksken oal wief raaizde Hinnerk weer op hoes aan. Tied um middagmoal te moakn. Kabbenoade met eerappels en boonen oet aign toene.

Noa ’t middageetn gung hai eevm op divan liggen. Mainsttieds ain haalf uurtje tot drij ketaaier eevm de oogn dichte.

‘s Middags gait Hinnerk in toene bezeg. D’r is altied wol dieverdoatsie zo as nou ook. Eevm ’t blad van ’t gres oafhoaln, eevm de schoffel deur de toene en ’t toenpad aanhaarkn. Tussendeur nog eevm kovvie drinken en den is ’t al weer oldert.

As hai teegn ain uur of zezze de kerkklokke heurt heft hai zien stoede met keeze en ain kopken melk al weer achter de koezen. Diggelwaark oafwasken bie de geutstaine en nog eevm bie de hounder kieken.

Eer dat ’t teegn ain uur of haalf tiene tied is um op ’t nust te goan, eerst nog eevm ain borreltje en ain stoksken worst. Trui en bezoen worden weer over de stoule in de keuken legt. Nog eevm noar ’t huussie en de achterdeure op slöt. Stel die veur dat zai die wat brengen wilt midden in de nacht. Handen en snoede nog eevm oafgroetjen en de striepkoorn boksem oet.

Hinnerk zet zok op ’t nust en vleit zien knokege bainen op berre. Hai kropt daip in de hoole en dut de oogn dichte.

Mörgn weer ain dag as hai ‘t beleevm mag.

2022