Carnaval

t Is weer februoarie, tied van carnaval komt der weer an.
Dee mie denken an t volgende verhoaltje, speulde zug of in begun zeuventeger joaren in Oostwold WK.

k Ben gain kroegloper, dat dee je ja nait as gehailontholder ja.
Mor al mien bruiers en zussen haren zug over loaten holden om bie de carnavalsverainiging op Oostwold te goan. Mien vraauw en ik hebben ons loaten beproaten en bennen ook mor lid worden van “De Geintrappers.”
In de zoal achter Banderingoa zien cafe.
Je mos verplicht verklaid komen, t moakte nait oet as wat.
Ik ging as dreugkloot met n poar grode oren, enorme neus.
Och man, t duurde mor even, t elestiekie woar neus mit vastzat begon zeer te doun.
Mor goud, de oavend wuir vervroliekt met aine dij moppen ging vertellen, t was n haile bekende Grunneger: Piet Fransen, bliekboar voetballer, al kon ik hom nait, k hol ook nait van voetbal ja.
Ain mop kin ik mie der nog van heugen van bussjeveur in bus noar Stadsknoal.
Dat was ja wat. Wordt toakelwoagen beld, bus is t knoal inreden.
Plietsie der bie, toakelwoagen trekt bus weer oet knoal, waren gelukkeg gain aarge ongelukken bie beurd.
Gaait plietsie dij sjeveur ondervroagen: “Wat is der gebeurd dat bus zo knoal inreden is?”
Antwoordt sjeveur: “Dat wait ik ja nait, was net even de bus in om koartjes te controleren.”
t Zal wel n Belg west hebben.

VERKLAID KOMEN

Elk mos verklaid komen en dat deden aandern ook.
Ik zol nooit verklaid goan as vraauw, nait mit rokken an lopen of zukswat, dat past nait bie mie.
k Vind t ook niks as n aander dat dut.
Mor dij oavend gebeurde t volgende:
Deur van zoal wuir open doan en komen der twije binnen.
Ik heb twij keer keken of t wel klopte.
Komt der duudelk n man binnen, stevige kerel, hannen as kolenschöppen, echt aine dij boeten waarkt, mit broen en verweerd heufd, hannen en aarms.
Kon nait van zunnebaank komen want dij was der dou nog nait.
En de man was verklaid, en wie keken en barsten in gieren oet, dat was komisch.
Man haar n tutu an, zo n klain pakkie van baletdanseressie mit stief oetstoand rokkie..
Veuls te krap, netuurlek, en zo n wit mailootje an, je ken t geleuven of nait, man was zo behoard dat ter deur t mailootje hìn kwam.
En an bovenkaante gulpte t hoar der boven oet.
Net as op zien blode aarms.
En hai laip op zien tonen mit van dij spitzen an vouten, t was n heul apaart gezicht.
Ballerinoa mit vairkaante kop, mor hou din ook, hai kon zulfs sprongetjes moaken en mit de vouten tegen elkoar anklappen.

Dat was wel de apaartste balerina dij ik ooit van mien leven zain heb.
Gloepens mooi man.
Nee, k goa zien noam nait nuimen, hail Oostwold ken hom.