Boerenverdrait…
Kil en kèl, kold en grel
kikt d’olle boer over zien laand en denkt aan zien vraauw.
Veur joaren trug is ze hom ontvalen.
Laifdevol denkt e aan de joaren woarin ze zied aan zied t laand bewaarkten.
Veul tied om te proaten was der nait. Achterof haar e heur nog zoveul zeggen wild.
n Troan glidt laangs zien neuze.
Hai sloet zien ogen en in stilte van de mörgen heurt e heur stem weer.
Mit n veeg van zien rooie buusdouk snoft e zien verdrait vot
en mit zaachte stem sprekt e zachtjes de woorden: ‘ik hol van die…….’