Blikken Lieske
Sunt n moand of wat heb k n nije rolstoule. Ik mog n kleur uutzuiken, ik kon uut vieve kaizen. Zulvergries leek mie wel goud tou, dus ik vruig om ‘Platinum Silver’. Toun k hom uutèndelk kreeg, bleek e swaart te wezen. Dat dut mie denken aan de bekendste uutsproak van Henry Ford: “Kinst hom in aal kleuren kopen, as e mor swaart is.”
Dat ging over t benuimdste model van zien Ford Motor Company, de Model T. d’Eerste auto dij aan d’lopende baand en in dikke aantallen moakt wuir. ‘Tin Lizzy’ het de massa motoriseerd. Swaart was nait d’ainegste kleur. Staarker nog, van 1908 tot 1914 was de Model T zulfs hailendaal nait in t swaart te kriegen. Hai was standoard leverboar gries, gruin, blaauw en rood. In 1912 kwam der wel n ain-kleur-strategie, ale T -Fords wuiren donkerblaauw mit swaarde sputterbreden.
Noa 1914 wuir veur swaart as ainegste kleur kozen, omreden dat dij vaarve t gaauwste dreuge was. Doarmit was de produksie van ain auto in n kördere tied kloar, van dij gevolgen dat der meer T-Fords baauwd en verkocht worden konden. t Zel vervast ook goudkoper west wezen om mit ain kleur te waarken, den kon de verkooppries omdele en wuir n auto veur nog meer lu betoalboar.
En zo bleef t, totdat de verkoopsievers omdele gingen. Om meer kopers te trekken, waren vanòf 1926 weer meerdere kleuren te kriegen, moar dat hólp nait meer.
‘Blikken Lieske’ was inhoald deur de tied. In de negentien joar dat Henry Ford zien gaisteskind beston, wuir der sikkom niks doan om t model wieder te ontwikkeln en te verbetern. De Model T was technisch verolderd en nait meer in trek bie lu dij tou waren aan n nije auto. In 1927, noadat der dik 15 miljoun stuks van moakt waren, luip de leste van de baand òf. Zien opvolger, de Model A, was leverboar in vaar standoard kleuren. Doar was swaart nait bie.
As t bie mien rolstoule nou ook zo was as bie de A-Ford, haar ik hom vervast wel in t zulvergries kregen.
Nou wil k wieder nait over n kleur soezen. t Is gain mode-artikel en k mout t der n joar of wat mit doun. n Rolstoule huift nait opvalen, dij der in zit mout d’aandacht trekken (of nait, vanzulf). Swaart is mie net zo goud, moar haar mie den nait kaizen loaten.
