Bliedschop
n Blied gezicht, n vrundelk woord,
n proatje over t weer
dat dut mie deugd, niks wat mie steurt
ien dizze goie sfeer.
n Vogel vlugt hail hoog ien lucht,
ik fiets deur zun en wiend.
Veul kin ik zain ien vogelvlucht
k vuil mie weer n kiend.
n kiend, dij blomkes plukt en ropt:
“Doar stoan der nog veul meer”,
en aal mor deurplukt en nait stopt
dat geft mien bliedschop weer.
Dit kiend ien mie,dat geft mie zin
ien t leven van ale dag.
Zo wil ik leven, k hoop dat k t kin,
din krigt t zien beslag.
