Bie Manske heur je nog ais wat!!
As advertensie-verkoper kwam k aal weeke bie Manske. En k mout zeggen: mit veul plezaair!
Dinsdoags was de dag dat k eev’m langs ging om te kieken, of der wat te verdainen was…
Hail gauw haar k al deur, dat t zoaterdoags nog veul plezaireger was op zien luttje kantoortje in de enorm grode romney-loods vol mit allerhande spullen.
Den gooide hai de kiosk open woaroet patat en fricandellen verkocht wuiren.
n Drokte van belang! En… altied in veur n proatje!
Somtieds wel twaalf, dattien man in dat luttje kantoortje.
“As ie kovvie hebben willen, t staait op t aanrecht, melk en zuker stoan op toavel”, was aaiweg t taimke van Trijn -zien vraauw, dij nait minder gastvrij was-.
En den ging t loos! Stoere verhoalen over luu, dij langs west wazzen, moar ook over zien handel en nait te vergeten, de verhoalen over vrouger…!
Wat doar aan t verleden over toavel gung…
Nait allaind flauwekul, nee, ook over t ontstoan van Kloosterholt enzo.
“Manske, doe woonst aan Troanendalloane, woar komt dat vot?”
“Ja…, dat zelk joe vertellen…” t Stoule kwam wat noar veuren om zien gasten veuraal niks te loaten missen en den:
“Ie waiten vast wel, dat der vandoage de dag n bult luu bennen, dij in heur laand bedraigd worden en hier heur hail zuiken. Dat is altied al zo west, dus: niks gain nijs onder de zunne!!
Zigeuners wazzen vrouger luu, dij ze naargens hebben wollen. Oet Egypte kwamen ze mit doezenden noar Europa en honderden doarvan kwamen via Schanze in Kloosterholt. Hier, op dit stee, woar nou mien loodsen stoan, wollen ze heur woonwoagens zetten om vervolgens van hieroet heur woar aan de man te brengen…”
Je heurden mensen dinken: ‘zol hai ook n zigeuner wezen?’ De link mit zien neern was ja al gauw legd…!
“Heb je zin in n zolt heerntje?”
Onder heerns opmoaken pruit e gewoon deur:
“Kloosterholtjers wazzen t doar nait mit ains en kwamen s nachts mit schuppen, snitten en zaizen aanbroezen en hakten op dat volk in! Der was zoveul geweld, dat mainege zigeuner sneuvelde en wat der over was is vlucht richting Maiden/Muntendam. In tied dat dat west het nuimden d luu dit dail van Kloosterholt ‘Het dal der tranen’. Loater: Tranendallaan!!”
“Achter de Maiden bennen zai dou deelstreken. Zo as ie wel waiten, hait dat nog aaltied: Egypteneind!
‘Wat n logica’, docht ik. Moar t heurt goud…
“Al gaauw haarn ze deur, dat n beetje wiederop, n beter stee was om zok te setteln en doaroet ontston Muntendam…
As je d echte Muntendammers kennen, waiten ie dat dat aal gitswaarde luu bennen.
“Verrek, hest geliek”, was de reaktie van enkelden, dij mit bek open t verhoal tot nou tou aanheurd haarn. Ie konnen ze dinken heuren: ‘woar hoalt hai t vot…!’
“Den waiten ie ook vast wel”, ging Manske wieder, “dat Muntendam n echt koopmansploatse was?”
‘Joazeker!’, beoamden touheurders.
“Wait ie, houveul hondekaarn der dou wazzen?”
“Nee”
“Zes honderd! En dij zworven elke moandag oet. Zai laipen haile noar Drinte en Vraislaand om heur woar te slieten! Appelsienen was dou heur grootste handel, moar der wazzen ook pardie dij bozzels en aander hoesholdelek spul verkochten. En vis! Nait elk was vanzulfs koopman…”
“Net as overal, haarn enkelden gain brood op plaanke. Zai belandden loater bie boeren in t Oldambt.
n Poar handen vol settelden zok tussen Nij Scheemde en t Woar!”
“Verrek”, zee ik, “dat klopt! Doar ligt t streekje ‘Luttje Muntendam!'”
“Joa”, beoamde Manske, “en doar wonen Sam en Moos…”
‘Den is mien schoonvoar ook n zigeuner’, docht ik, ‘dij komt doar vot en is ook gitzwaart… enne… Den klopt zien verhoaltje, dat e as klain jonkje n moal kidnept is deur zigeuners ook!’
Mien hazzens begonnen te kroaken: de Nijlanten en Drenten, zai wazzen aaltmoal zwaart!
“Nou begriep k woarom die t zo goud gaait”, mos k nog even kwiet bie t oafschaaid.
“k Dink t ook grijnsde Manske; tot volgende weeke! Moi!”
k Mos t verhoal vanzulfs vot kwied aan moeke…
Moar dat heb k waiten!
“Hol der toch over op raip ze: wie zigeuners? Kirrel woar hes t dien verstand! Manske het joe der n mooi ploatje op draaid!”
Ik heb mie moar stil holden. Misschain haar ze geliek, moar k wol der nait van waiten: t Was zo’n mooi verhoal, dij goei je toch nait vot…?
Tot n aander mie bewiezen ken dat t oet Manske’s doeme kommen is, hol ik t veur woar!
