Bevrijden
n Omstreden gevuil
deur aaldoagse dingen
nait te bevrijden.
Heur hannen strelen
t strakke vèl vuilt waarm en spans
t luk laagje bevrijd.
Zien heugenizzen
gunnen hom gain bevrijden
n oorlog dij won.
Stilleghaid van no
let meziek ien mien oren
heuren als vroger.
Noa joaren zuiken
tussen honnerden noamen
zigt zai ook zienent.
t Vernijs opbaauwen
lait ook dat beeld verswienen
van oorlogsgeweld.
Weervonnen vrijhaid
leutje uren veur mie zulven
om te dagdreumen.
Bie t monemint
kriegen noamen no n stem
ain veur ain veur ain.
Verloren vrijhaid
òfnasket ien n leven
dat nait van hom was.
Bevrijdend gevuil
dat nait te meten verdrait
veur aaltied burgen.
Gedachten zweven
veurbie dij tied van vroger
noar n nij begun.
Ien vrijheid leven
bevochten as hoogste goud
mor draaigen stopt nait.
Vandoag en ook mörn
goan vrijheid en tirannie
vechtend over stroat.
Soamen herdinken:
nooit weer gebeuren loaten
dij oorlogsjoaren.
Dat oavendloopke
is bevrijdend noa t haarde waark
ook zien hond is blied.
Gezichten kommen
ien dreumen weer tot leven
ongriepboar geluk.
Noa laange joaren
deur aner minsen bevrijd
vernijs leven goan.
Tied geft gain vrijhaid
om zörgeloos te leven
as God ien Frankriek.
(Schreven veur n bieainkomst van
“Vertèl ais” op 7 maai 2016,
dij t taiken ston van bevrijden.)