Akkedaaiern
Der wer aal tieden over proat
Zoas dat mainsttied gaait
Doe zólst kommen, dát ston vaast
Van mie huifde t aiglieks nait
Mor op n goie dag in haarst
Kwamstoe mit veul bombarie
Vanales wer noar binnen sjaauwd
Dien haile pakkelarrie
Doe kreegst n koamer bie ons thoes
n Nij aigen stee veur die
k Huil mie ofziedeg want k von
Wat mou’k nou toch mit die
Noa verloop van tied, leerde
Ik die veul beder kennen
t Vuilde goud bie die, ik begon
Aal meer aan die te wennen
Hou voaker dat k bie die kwam
Hou staarker wer ons baand
Dát haar k glad nooit docht, kon
Der nait bie mit mien verstaand
t Akkedaaiert tussen ons
Doe bist mie aal zo ‘aigen’
k Begun zulfs om die te geven
Doar zel k nait over laigen
k Bin zo aibels blied mit die
t Is nou ainmoal zo lopen
Toun k aanhold kreeg mit die
Ging der n wereld veur mie open
Elke dag kommen wie soam
Doe hest ale tied veur mie
En ik zeg die, mien computer,
k Wil nait meer zunder die!