Aarm
Ain het ’n tun, dei ’n miljoun,
De mainsten motten ’t mit minder doun.
D’r binnen ook gounend in stad en laand,
Dei leven zo van haand in taand
En den nog ken ie stumpers zo aarm vinnen,
Dat z’hail heur levend aan ’t staarm binnen,
Zo aarm, zo doodstraotaarm, as ’t hait,
Wat ’n levend en ’n aokelkhaid.
Nog groter stakkers bin d’r hier beneden,
Van Aodams tieden tot op ’t heden,
Ken ie ze nait? Den zel ‘k joe ’t zeggen,
’n Woord of wat om even uut te leggen:
Dat binnen de knirtjebruiers wied en zied,
De penning-zestiens, dubbel kriet,
Mit pien in ’t lief veur ieder uutgeven sent,
De zunege paiters, welbekend,
De gördetellers, doitendaiven, krintjebakkers,
De zesd’ haalfstuvers, knipmitdoemkes, knirtjekakkers,
De kniezebieters, krubbezoegers, vlooienvilders,
De keutelmoezen, griengezichten, schooiergilders,
De sentenslikkers, bonkenbikkers, knokkelkniepers,
De schietvernientjes, iepentrientjes, traonensliepers,
De aarbaidsloon-aofdingers, woukerwinstverdainders,
De zunlichtdaiven, zulverslaoven, gelduutlainders,
De schraopers, gieregaords, de vrekken,
Heur bule dat is ’t hoogst, ’n aander kin verekken,
Déi lu bin meer as dood – straot – honger – aarm,
Dei, dei van pien in ’t lief veur volle schuddels staarm.