Maleghaid

(Ken je ook zingen)

Hai ston bie heur deure te vrijen,
En ‘t wicht docht: „Nou zel ‘t mie beneien,
Hou ver of e vlucht,
As voader hom zugt,
Want voader het kracht in zien kneien.

Dat „dinee” ken Raint Koops nait vergeten,
Hai haar noast de Wetholder zeten,
Dei vruig of ‘t voldee,
Moar Raint zee van „Nee”,
„’k Heb laiver ‘n fesounluk moal eten”.

Ol Jans muik meer op dan zien renten,
Zien neef wol hom preekstoul aan prenten,
Ol Jans zee: „Wel wait?
Moar zuneg wor ‘k nait,
Wat heb ‘k in de hemel aan centen?”

Dei Jan het Kloas Kamps nooit gain vree van,
„As ‘k dien voar was — wos ‘k wel wat ‘k dee Jan”.
Jong zee: „Dat ken best,
Ze is laank wedevraauw west,
Mien moeke zegt vast nait van nee, man”.

Pait mag ale wichter groag lieden,
Zien moeke dei zegt wel bie tieden:
„Woarom traauwst toch nait — Pait”,
Moar hai zegt: „Ik dou ‘t nait,
„’k Wil ze aalmoal om aine nait mieden”.

Loeks vrijt mit de maaid in de stale,
Zit ‘s oavends mit heur in slootwale,
„Ik krieg hom”, denkt zai,
„’t Is ‘n laiverd”, denkt hai,
„Moar ze krigt mie toch nait in de vale”.