Engel met lucht
k Heb boodschappen ien fietstazen staauwd.
Is fietsen nog wel vertraauwd?
Ik staaiger zo’n beetje met t haile geval
As k nait uutkiek komt er n knal.
Mien achterbaand bonkt over stroat,
straks is t nog te loat.
Omzichtig rie ik recht op t doel
langs elk stuk glas, om elke koel,
den rem ik met mien vracht,
mien band is veuls te zacht.
Woarom zit dat ventiel
net bovenaan ien t wiel?
zo kin k der ja noeit bie.
n Vremde kerel laagt noar mie
met laive ogen ien hemelsblaauw
vroagt er: “Lukt het mevrouw?”
Ien n klaain schofke tied
ben k de pomp al kwiet,
zien staarke aarms
bennen t pompen wel wend
wat n alleroaregste vent.
Oplucht ontwiek ik nog net n doef
as k verend mien engel veurbie stoef.
