Ie kinnen der mit lezen en schrieven
Weerkerel zee
zun mit n wolkje
zeker aan zee
doar bie t westers volkje.
Mor hier ien Nijlaand
lig k lekker onneroet
mor t broenen wil van gain kaant
van zun geft nait thoes.
Meer wolken as zun
k word der kold van
goud mor aan en run
noar hoes, noar mien noamoakzun.
Ik bin n echte Hogelaandster en woon sunt 1992 op Nijlaand; har der al eefkes eerder woond mor wachten was op vergunnen veur nij te baauwen hoes.
Ien 2008 bin k op kurzes west bie Piet Kruzengoa ien Kannes, doar kwam k Nane van der Molen tegen en wie wolden baaident wel noar vervolgkurzessen op Hoogezand, ook joar derop nog noar “Dichten op zien Grunnegs” west; mor ientied konnen Nane en ik ook bie Kees Reinders en Piet Kruzengoa op les, dat is goud bevalen.
Op n gegeven menint wer k beld deur ain dij zee of k belang har bie leste semester van Siemon Reker aan RUG (nou kende k Siemon want wie binnen ja baaident opgruid ien Oethoezen) te volgen: dat hemmen Nane en ik baaident dus mor doan.
Omstreeks dij tied was der ook n vroag of wie mitdoun wollen aan Winterwelvoart, ien n Daam en Stad; kregen les om oet kop te vertellen van Erik van Dort. Olle zeemansverhoalen vertellen ien veuronner van versierde en verlichte schepen.
Ook hemmen wie baaident mitwaarkt aan verhoalen vertellen bie SIB tv ien Oethoezen.
Nou schrief k nait meer (sunt overlieden van mien man); wel heb k òflopen joar (2023) op 4 maai 2x n lesen doan ien Oethoezen: op stee doar omkommen Juljus Cohen woond het (over zien leven en waark).
