Zulfveurzainend?

De Bisschopsweg. In tied van de Munsterse Oorlogen ànlegd deur de soldoaten van Bommen Berend. n Lieke liene midden deur t bochtenlandschop. Kilemeters laange sniedt hai d’horezon in. Stroal op de toren van Winschoot òf.

Wat was der eerst: t bos of t busje? In t busje is hai anrieden kommen. Hailemoal uut t vere Transnistrië, dik twijdoezend kilemeters rieden. As hai ànkomt in Troapel sturen dij hom vot, der is gain ploats. Hai mout loater nog mor es weerkommen. Mor t busje stopt der met. Tusken Veelerveen en Vraiskeloo staait t defenetief stille. Gain bewegen meer in te kriegen. Dus blieft hai doar mor wonen, in zien busje.

t Bos ontstaait. Stoens as de boardhoaren rond t gezicht van börgmester Engbert Drenth spruten de boompjes de grond uut. Botten uut tot ondeurdringboar stroekgewas tou, tot n bos tou. Dat an weerskaanden de Bisschopsweg smoort tot n spoukeg smaal padje. Maank al dij stroekerij is t busje nait meer te zain.

En in t busje woont hai, zulfveurzainend. Uut pallets baauwt hai zok n hounderhok veur zien aaldoagse aaitje. Uut t dak van t busje stekt n schösstain veur zien holtkaggel. Der is n moustoen. En elke veumirreg n duuk in t Tijdensknoal. Dat ligt ok ja kört bie.

Zulfveurzainend? t Is nait t komplete verhoal. In de dörpen struunt hai eterijkastjes òf veur n pak makaroni en n pot tomoatensju. Den kin hai zok wat te eten moaken. Bie de kringloopschure tegen de meulen van Veelerveen over kin hai zok n bietje inrichten. En hai het nog zien vliemschaarpe mesjes, gutsen, baaidels om holt met te snieden. Wat van Transnistrië dat hai metnommen het. Onder zien handen vörmen zok holten onderzetters, sniedbredden, borden en schoalen vol slingermetieven, blommen en planten en veugels. Hai schenkt dij weg. An de buren. An lu dij hom te kovviedrinken neudegen of woar hai meteten kin. Goandeweg pikt hai t Nederlands altied meer op. Na ja, aigliek benoam t Grunnegs.

En hai klust. Hai ontmoet de schift manlu dij zien toal spreken. En dij glasvezelkoabels bie ons de grond in groaven. Zunnepenelen op onze doaken monteren. Aircos instelleren, waarmtepompen. Laange waarkdoagen, mor den hest ok sinten om van te leven.

En zo börgert hai in. Zien Oosteurepees aksent blieft. De Grunnegers blieven tegen hom ankieken as aine dij nait van hier is. Mor hai waarkt en hai het n onderdak, zien busje. Zo daip bestopt in t Engbert Drenthbos dat gain aander t vindt. De gemainde nait, plietsie nait, gainaine nait.

Mor allinneg is mor allinneg. Zok vernuveren dut hai bie zien moaten van t waark, in zien aigen toal. Zai waarken 12 uur, laange doagen. Tussentieds hoalen zai wat eterij bie de McDonalds. Sumtieds is der n vlezze wodka dij zai soam soldoat moaken.

En thuus gedaaien zien hounder, leggen aaier. Zien woddels, kool, siepels, praai, knoeflook stoan der schier bie. Der is genog dreug holt veur de kaggel. En veur zien holtsniedwaark. Zummer en winter: elke veumirreg de duuk in t Tijdensknoal.

As hai en zien moaten weer es eterij hoalen zugt hai heur zitten. Aalgedureg en luud heurboar proat zai Oekraïens in heur tillefoon. Zai het hier de tiedelke beschaarmen veur ontheemde Oekraïners kregen. Om reden van d’oorlog mit Poetin. En zai proat en zai proat mor in dij tillefoon. Asof zai direkteur is van n multinational.

d’Eerstvolgende moal dat zai eterij hoalen zain zai heur doar weer. En proaten zai mit heur. Dana is kort en streveg, staait mit twij bainen op de grond en proat en proat. In d’opvang vindt zai t mor niks. Al dij ambtenoarij doar en zai verveelt zok aibels. Hai en zien moaten zeggen nait zoveul terog, luustern benoam. Dana vroagt zien nummer, slagt t op in heur tillefoon.

“Oleg” klinkt t dij oavend as hai òpnimt. Hou wait zai noe dat hai Oleg hait? Na ja, moakt ok nait uut. n Uur laange is zai an de proat. Hai stopt heur, wil sloapen goan. Zai winsken nkander goude nacht, mor hai dinkt dat zai d’haile nacht deur tillefoneren blieft.

Elke dag belt zai hom. En op n gegeven moment is t zo veer dat hai heur neudegt. En heur veurgaait, de weg wiest deur de stroekerij. Bie zien huusje kiekt zai tevree om zok hìn en zegt dat zai bie hom wonen komt. En doadelk is zai mit heur laptop bezeg. In nog gain uur het zai n webwinkel òpzet veur t holtsniedwaark van Oleg. Tegen priezen woarvan hai zölfs nog nooit het dromen duurven. Dij zölfde dag nog kommen d’eerste bestellens binnen.

As Dana nait mit Oleg proat, of mit heur tillefoon proat, den proat zai mit de hounder. Dij proaten weerom mit heur geluudjes. Bennen meroakels op heur steld, zai willen zölfs op schoot zitten. Oleg komt thuus noa 12 uur waarken en heerleke etensgeuren dampen hom tegemuit. Alens is kouk en aai mit hom en Dana. Enkeld dij duuk in t Tijdensknoal wil zai nait. Dat is heur te kold.

Heur buuk bolt op, zai goan n kindje kriegen. En de bestellens veur t holtsniedwaark blieven binnenstrulen. As zien moaten òfraaizen, terog noar heur laand, blieft hai nait waarkloos achter. Haile doagen kaarft hai zien slingermetieven van planten, blommen en veugels in t holt.

Noa òfloop van n dag haard aanaarbaiden kieken zai soam noar d’oavendhemel. Dij het ale kleuren van de zunsondergang. Den verschient hoog boven heur heufd n wit lichtje mit pal doarnevven n knipperend gruin lichtje. t Blieft laange op de zölfde stee zweven. Zai hebben wat heurd over Russische drones, woarveur in Europa haile vlaigvelden stille legd worden.

Mor zai kennen Poetin: hou meer doe in peniek roakst van dij drones, hou nuverder hai dat vindt. Dit wit-gruine lichtje dut niks. t Blieft n toertje in de locht haangen. En as der niks heergaait is t mor weer vot.

Niks om baange van te worden. Loat t mor lös en genait van dizze mooie stille oavend. Wie zitten hier ongesteurd maank de stroekerij in t bos. In n algehaile stilleghaid. Zölfs de torenklok van de kerk in Vraiskeloo loat zok nait heuren.

Dat was wol es aans. Asbest wuir in t bos dumpt. Mit veul drokte wuir dat òpruumd. Mor gainain ontdekte heur huusje. Eerdoags nog vonden lu plastieken voaten mit chemekoalien. Dij groafden de grond doar omhìn uut. Mor gainain dij heur huuske ontdekte.

En noe is der n moan dij leventsgroot in d’hemel staait. Zo kört bie mit al zien donkere plekken en baargkedden. Wie hebben heurd dat dizze moan 27.000 kilemeter dichter bie d’eerde kommen is as aans. Dat is nog es n òfstand! Dij poar doezend kilemeters van Transnistrië noar hier bennen doar peanuts bie.