Zo is t
Deure staait altied bie hom open
deur dik en dun zel hai mie steunen
kin mit alles bie hom terecht
hai let mie nait boeten stoan kleumen
Hai zel as e kin mie altied helpen
deur doad of n goud gesprek
wie kìnnen mekoar ook al joaren
dat is veur mie de juuste plek
Baaide hebben we vraauw en kinder
dat brengt sums ook weer zörgen
en ook al het hai t nog zo drok
hai komt vot, wacht nait tot mörgen
Viemdatteg joar woar blift de tied
kinder binnen al op heur aigen
mor ook dìn hebben we zat te proaten
woardeur we uren veurbie vlaigen zain
Hebben ie al deur woar k t over heb
n vroagboak veur n oor en road
dìn zel ik joe dat vertellen
dat lu is mien beste kameroad.