Zezze

Graitje Klain dat was ain schatje
Van moar net nog zeuventien.
Har al aan ain jenteg klaidje
Opgewaarkt mit rood setien.
Mit wat bloumkes op de veurpaand…
Zezze, drij aan elke kaant.

Andries was een nuver ventje
Twei moand older as het wicht.
Har, zo schienboar veur de leuze
Kleine hoarkes onder neuze.
t Was nait veul, ik zeg zien schaand:
Zezze, drij aan elke kaant.

Andries kwam ais Graitje tegen,
Ze waren eerst nog wat verlegen.
Moar al gauw was t oet mit blozen
Luipen zai te minnekozen.
Gaf hai smokjes, het haart verpaand,
Zezze, drij aan elke kaant.

Moar heur voader, d’olle Klain,
Haar ais dei meroakels zain.
Wur, van niedeghaid en toorn
Rood tot achter baide oorn.
Gaf heur oorvegen mit volle haand,
Zezze, drij aan elke kaant.

Op de bozzem bie ol Klain
Kon je, joaren loater zain
Een petret met Dries en Grait;
En alennig wazzen ze nait.
Haarn heur kinder stief bie de haand…
Zezze, drij aan elke kaant.

Instuurd deur: Jan Bos, hai schreef der bie: “Het is grotendails schreven deur mien opa, Hendrik Bos (1881-1951), schoolmeester in Haarkstee. Zulf heb ik t ritme n beetje verbeterd en der n koepletje biemoakt.”