Zeekoap
Nou endelk t ies wat oet voarten en moaren rakt, zai k aalweg slagtovvers van moeke netuur. Visken dij vaastroakt binnen in t bevroren wotter. Meschain nait zo rad votkommen konnen en allerhaande vogels dij t loodje leggen mossen. Zitten mit poten vaast in t ies. Wazzen mainstekaans te mui om oet te slupen veur t noadernd gevoar. Ies mag wel n bult dieverdoatsie wezen veur t volk, mor n ellèn veur paardie daaier en t vlaigend spul. t Is al n hail gedou aan voldounde vouer te komen, loat stoan in dij kolde. Benoam as t boetenwotter under n dikke iesloag ligt en t laand under snij. t Vaalt n meens ja al stoer, loat stoan aal aander kreoaturen. Wie kinnen n dikke jaze aandoun, n pole over oren rieten en vouten in waarme stevels steken. Zokswat is veur heur nait weglegd. Bievouern is der bie zetten ok nait meer bie. Staarksten zellen t redden en seupelsten leggen kop dele. Zo waarkt dat ja in netuur. Dut mie denken aan Spartoanen, dij lutje potje noa geboorte mit kop in n tobbe wotter staken. Wel t levent der ofscheurde mog blieven, d’aandern verdainden heur bestoan op dizze eerdkloot ja nait, bezörgden d’olden allènt mor kripsie en verdrait. Wanner heb zokswat eder heurd? Hitler en zien misdoadege konzorten konnen der ok wat van! Dij omdeel valen kopperoal zel t wel aargenswoar opdoan hebben. Maaiden ongevroagd onvrugtboar moaken, behulpzoamen oet wege roemen. ‘Untermenschen’ ledderlek n kop klaainer moaken. Harregat, t is bie toeren ja onnuur wat n meens zien noasten aandoun kin! Vlaig as doeve, zeekoap of aandersoortege vogel wied vot, as t winter wordt.
Zuik n waarmer plekske om te overwintern. As je t van t twijbaineg volk hebben mouten, kin joe t wel ains maal mishottjen. Veur as je t in smiezen hebben zit je bie winterdag mit kop of poot muurvaast in t kolde ies. Over n hoogvlonder veur mien hoes zag k n haile zoot smienten en ainden, as ok n koppel verdwoalde zeekoapen. Zie sirkelden om n kezoat, dij mit t lief in t ies zat. n Wit kopke, grieze vlerken en n swaart steerke. n Allernoarst mooi daaier. Allenneg ogen har e sloten. d’Aandern vlogen hin en weer, of ze hom helpen wollen. Muiken n bult misboar. Angeln messchain om t verspeulde levent? Aine keek mie mit zien oogkes wat loos aan, of e zeggen wol: “Wat n lieder nait?”
12 jannewoarie 2011
