Woar is dat nou veur neudeg?
Je vroagen t joe wel ais of. Messchain hemmen ie dat nait, mor ik mout bekennen, dat t mie sums wat aal te veul wordt.
Ik zel joe dat ais oetstukken. Veurege week Vrijdag, t was mooi weer. Fietse tot schuur oet en op t rad noar stad. Mooi tochie langs t Hoornse daip en op t leste stuk langs de Potterwoldse weg.
En doar docht ik: Kom ik fiets ais even langs t Heerenbad en t loezebadje. Op Wonsdag kon je in t loezebadje vergees zwemmen, nou doar wer ook aaltied drok gebruuk van moakt. Haile wat kinder oet stad hemmen doar t zwemmen leert. Ik ook, mor t ainegste wat er nog staait is de ingang en veur de rest, ales vot. Zunde, gewoon zunde. Mor doar wol ik t nou nait over hemmen.
Ik fietste dus eerst nog mor even wieder en kwam zo bie de Westerhoaven oet. Nou ja Westerhoaven? Doar kennen ie ja ook niks van weer vinnen. t Is aalt n duvel verswonnen. Grode winkels, ie worren der ja sikkom nait goud van. Moderne tied, zee der aine. Nou ik docht, ik mout mor ais even binnen kieken. Fietse met twei slötten op slöt en ik noar binnen.
Och mien laive toetpot, wat ja n boudel. Lange riegen wasmachines, tillevisies, radios en wel viefteg soorten slagroomkloppers en goa zo mor deur. Het doezelt joe veur de kop en zo ston ik wat draaiereg rond te kieken. Komt der n meneer in overhemd bie mien stoan. Ales goud met joe meneer? Zo vruig e. Ik zee, ik mout der weer oet. t Word mie te gek hier. Hai brocht mie noar boeten en zee nog even haile vrundelk. Komen ie nog ais weer meneer? Ik knikte van joa, mor wos dou al wel, dat dat nooit zol gebeuren. Mor, doar wol ik t nait met joe over hemmen.
Ik was aigenlieks noar stad goan om bie bakker Knol op t Zuuderdaip n poar puutjes met mollebonen te kopen. Gelukkig was ik doar vlak bie. Fietse weer op slöt en ik noar binnen. De winkelbel rabbelde mie gezelleg in de oren en dou wos ik t weer. Zo is t aaltied west en t zol hier dus ook nait veraandern.
De juffer achter de teunbaank, kwam van achter. Wat ken k veur joe doun?
Ik wol geern vaier puutjes met mollebonen. Dat ken zee zai, allent der is n klain probleempje. Oh, zee ik. Bennen ze oetverkocht? Nou nee, zee zai, De gewone mollebonen wel, mor ik heb nog wel haile fijne mollebonen met n pittege smoak, dei bennen noamelkieks gekruud. Haile lekker, t is net nei. Ik wil gewone mollebonen en gain gekrude bonen. zee ik grammieteg. Joa dij heb ik op t ogenblik nait zee de juffer. Ik ben stillegies noar boeten goan en noar hoes fietst.
Onnerwegens docht ik nog bie mie zulms. Straks hemmen ze nog mollebonen met paprikasmoak of zoks wat hen. Hai toch. Woar is dat nou veur neudeg?
