Wel wait hou ze hait
k Heb n verhoaltje schreven veur mien klaindochtertje. t Is n vertelseltje worden dij mien pa ook aaltied aan mien kiender vertelde en dat ze haitied hail kureg vonden. t Begun en t end waren altied t zulfde mor doartussen ien bedocht hai elke keer wat aans.
Ien n schier hoeske aan t Damsterdaip woonde ains n hail laif wichtje. Ze haar n beetje rosseg hoar, grote blaauwe ogen en waas aaltied blied. Ze woonde doar mit heur pappe en mamme. Ook haren ze n grote hond en n stel hounder.
Op n dag vroug ze aan heur mamme of ze wel n nachtje bie heur opa en opoe sloapen mog. Nou dat mog wel en dus pakte mamme auto en brocht heur vot. Ze ging geern noar opa en opoe tou. Ze speulde groag ien toen mit kat, plukte bloumkes, wat nait mog, en zat achter vlinders aan. Ook ging ze groag mit Opoe veur op fiets noar kienderboerderij. Ze namen din stoet mit en dat mog ze din aan baisten geven, mor ze at der zulf ook wel ains wat van op. Der waas ook n swien mit n hail dik lief woar ze n beetje baang veur waas.
Bie opa en opoe haar ze n aigen sloapkoamertje woar heur mamme ook sloapen haar en woar nog veul speulgoud ston woar mamme ook mit speuld haar.
Bie opoe kreeg ze voak wat lekkers te slikken, zo as n deuske rosientjes, mor t waas haildaal feest as opa ook thoes waas, want dij kon zo mooi mit heur speulen. Sums waas e n peerd en kroop e op knijen deur koamer hen mit t wichtje op rug of hai zong verskes veur heur woar ze din hail stil noar luusterde. Opa en opoe waren aaltied hail blied as ze n poar doagen bie heur waas.
Nou wol k die vroagen: waitstoe hou of dit wichtje hait??
Oet t Oethoester boukje 2
