Vradde

Langzoam an is midden op mien borst n vradde gruid. Veureerst enkeld n boeltje, mor noe n uutpulend baaltje as n daarde tit. t Schrient, reept, aimelt, t vuilt as n toetje an mien lief woar allerhand uutkommen kin. t Loat zok nait meer votpulen en as k krab begunt t vergrèld te blouden.
Op n dag komt n mail van Landal: ‘Mit bliedschop geven wie kunde van us nije vekaanziepaark. Krek as Barkhorn in Zèlng en bie Beetserkoele binnen nijmoodse energieneutroale bungalows te koop. Optuugd mit aal komvort dat joe zuiken. Meroakels goude beleggen en joe genotteren van vree en sjarme van Westerwolle, mit wotter altied kört bie.’
Dat mout k zain. T-sjurt omhoog, k bekiek mien vradde. De kappe is kleufd, openbarsten in kört op ainander stoande vaaierkaande blokjes. t Kriewelt n bietje en k zai mineskule kakkertjes an kommen rieden in heur kabrejolets. Dij slorren rolkovvers, toenstoulen, barbekjoes en surfbredden noar de blokjes.
Andermoal n mail van Landal: ‘Us nije vekaanziepaark ligt an t wotter. Der komt n surfplas in de koele benoastenbie de vradde, ter heugte van t end van joen borstbain. Ter wille van de survis an us gasten verzuiken wie joe dringend op joen rugge liggen te blieven.’
k Bin nog zo maal an heur verzuik te voldoun. In t koeltje op mien borst verschient n plasje wotter. t Waggelt op mien oamhoalen. En as k goud luuster heur k blied schraauwen van de kakkertjes dij op mien woagen surfen.
Zunder mie te vroagen legt Landal ok nog n golflink an op d’huud noast de vradde. Andermoal vuil k kriewelen en k zai kakkertjes mit heur keddies en golfkaretjes van porie noar porie schuven. Applaus as ain van heur n hool in wan moakt.
Ok weer ongevroagd legt Landal boven op ronden van mien buuk n vlaigveld an veur de privee jets van de kakkertjes. Andermoal veul krieweln. Mor t begroot mie benoam dat dij vlaigtuugjes lokken moaken in mien T-sjurt. Dij roppen gewoon dwaars deur de stof hìn. Mit nale en droad moak k de lokken weer tou.
Dat komt mie te stoan op n daarde mail van Landal: ‘Wie sommeren joe de tougankelkhaid van us vlaigveld nait te belemmeren. As joe gain gevolg geven an dizze sommoatsie bennen joe ansproakelk veur de schoade. Den zellen wie ale kosten op joe verhoalen.’
t Mout nait maler worden mit Landal. Zunder heur wat te bekommeren om mie, omwonende, baauwen dij n priezeg vekaanziepaark mit ales doarop en doaran. Waacht mor, k zel dij kriegen. k Rop n end droad spans in n knobe om de boases van de vradde hin.
Votdoadelk is der reuren onder de kakkertjes in de bungalows. Kroanwotter, elektrezeteit en rioleren binnen òfknepen. Busjes van instelloatsiebedrieven rieden an en vot. Mor gainain kin t perbleem van d’òfknepene laaidens oplössen. k Laag stiekom.
Elke nije daag rop k de droad om de vradde nog spanser an. De kakkertjes begunnen vot te lopen, vot te rieden in heur kabrejolets. As k goud luuster heur k dij ragen op Landal.
In t end komt t ogenstond dat k de droad zo spans omropt heb dat t vekaanziepaark lös komt van mien borst en in de wasktoavel vaalt. Vot vradde. En ok de surfplas, golflink en t vlaigveld liggen der verloaten bie. Dij vradde bin k nuver kwiet en t kriewelt ok nait meer. Van Landal heb k nooit meer wat heurd.