Veurdracht met n laidje in t Grunnegers
Het laidje is ain zogenoamd ‘stoapellaidje’. Dat hold in dat er bie elk koeplet ain regel biekomt. De stoapeltekst mouten ie bie dit laidje den van achteren noar veuren ritmisch op dezelfde toonhoogte zing-/zeggen. De stoapeltekst stait hieronder in elk koeplet in t gruin.
De tekst van het laidje ligt vast. Moar as ie der ain couplet bie kinnen verzinnen of aine wegloaten kin dat vanzulf wel.
t I is aigenlieks de bedoulen dat de minsen de leste regel “Joa, dat is ain schöne riederij” mitzingen. Dat mout ie van teveuren mor eerst even oefenen.
Misschien kinnen ie grote taikeningen moaken op een “flap-over” en den met n stok aanwiezen wat er ieder keer biekomt.
Moaken ie der moar wat van! En veul succes!
De wieze van t laidje is schaande genog nait meer te achterhoalen. Wait aine dat nog? (redactie)
Anton op de bok
En Anton har zon zin
in peerdjerieden leren,
moar joa, hij had geen peerd,
kon t ook nait leren, zien
moetje gaf hom n zegebok,
n zegebok, Anton der op. En
is dat nou gain schöne riederij?
Joa, dat is ain schöne riederij!
En Anton op de bok
wol peerdjerieden leren
do har e nog gain toom
kon t ook nait leren, zien
moetje gaf hom boorband,
boorband in zien hand
zegebok, Anton der op. En
is dat nou gain schöne riederij?
Joa, dat is ain schöne riederij!
En Anton op de bok
wol peerdjerieden leren
do har e nog gain zoadel
kon t ook nait leren, zien
moetje gaf hom n boeskoolblad
boeskoolblad onder t gat
boorband in zien hand
zegebok, Anton der op. En
is dat nou gain schöne riederij?
Joa, dat is ain schöne riederij!
En Anton op de bok
wol peerdjerieden leren
do har e nog gain sporen
kon t ook nait leren, zien
moetje gaf hom n bossie takken,
n bossie takken aan zien hakken
boeskoolblad onder t gat
boorband in zien hand
zegebok, Anton der op. En
is dat nou gain schöne riederij?
Joa, dat is ain schöne riederij!
En Anton op de bok
wol peerdejerieden leren
do har e nog gain helm
kon t ook nait leren, zien
moetje gaf hom n pispot,
n pispot op zien kop
bossie takken aan zien hakken
boeskoolblad onder t gat
boorband in zien hand
zegebok, Anton der op. En
is dat nou gain schöne riederij?
Joa, dat is ain schöne riederij!
En Anton op de bok
wol peerdjerieden leren
do har e gain kuras
kon t ook nait leren, zien
moetje gaf hom opa’s vest,
opa’s vest aan zien test
pispot op zien kop
bossie takken aan zien hakken
boeskoolblad onder t gat
boorband in zien hand
zegebok, Anton der op. En
is dat nou gain schöne riederij?
Joa, dat is ain schöne riederij!
En Anton op de bok
wol peerdjerieden leren
do har e nog gain soabel
kon t ook nait leren, zien
moetje gaf hom n bezzemstok,
n bezzemstok aan zien rok,
opa’s vest aan zien test
pispot op zien kop
bossie takken aan zien hakken
boeskoolblad onder t gat
boorband in zien hand
zegebok, Anton der op. En
is dat nou gain schöne riederij?
Joa, dat is ain schöne riederij!
En Anton op de bok
kin peerdjerieden leren
met alles der op en der aan
kin hom niks meer deren, zien
moetje gaf hom n zegebok,
zegebok, Anton der op
boorbaand in zien haand
boeskoolblad onder t gat
bossie takken aan zien hakken
pispot op zien kop
opa’s vest aan zien test
bezzemstok aan zien rok. En
is dat nou gain schöne riederij?
Joa, dat is ain schöne riederij !!!
Instuurd deur: Jan Boekhoud
