Veur aaltied verloren?
Zeun van God het n haile bult verhoalen verteld, woar elks zienent oet hoalen kon. Veur elk wat wils! Nait zo loze lu wazzen al slim blied mit t verhoaltje zölf. Zöchten der niks achter, mor lu dij wat meer snöt in kop haren, zagen Zien bedoulen doarmit. t Was ja n soortement bosschop veur elks dij t zain wol.
Verhoal van verloren zeun is doar n sprekend veurbeeld van. Begoan as elk was mit dij votloper, dij goie sier moaken wol van aarvenis van zien moeke en oetèndelk zo aarm as n kerkrat bie de swienen in t hok terechte kwam. t Jong was onnuur van t padje roakt. Zien ‘kammeroaden’ wazzen rompslomps oet zicht verdwenen. Van elkenain verloaten, zag e t hailemoal nait meer zitten en trok ten lange leste mit steert tussen bainen hoeswoarts. Duurde sikkom nait op stroade te lopen, mor voader ston al op doagelkse oetkiek. Was oetzinneg van bliedschop dou e wegloper in smiezen kreeg. Sloot hom in aarms, smokde hom as n grode en nam hom mit in hoes. Elks kwam in t gereel om n oetbundeg feest te baauwen. Niks was aiglieks goud genogt.
Dit ston zien bruier aans niks aan. Mokde en pruddelde, wol hom zölfs gain haand geven. Har e doarveur zo piezakt? Nooit was der veur hom zokswat op taauw zet. Terwiel e aaltied zien uterste best dee om boudel veur nkander te holden.
Kon der aiglieks mit zien volle verstaand nait bie. Zien voader mos hom zölfs tot odder roupen. “Bist bie mie ja niks tekört kommen. Kinst mit mie nait blied wezen veur hom dij verloren was, mor gelukkeg t rechte pad weerom vonnen het?” Jeremia schrift derover in t Bouk (Jer.3:19): “En k har docht, dat joe tegen mie zeggen zollen: ‘Mien Voader’ en dat joe Mie rogge nait òfkeerden”. Dit bedoulde Jezus dou e t over dij zeun har. Gain aanschriefboukje mit n bult mitsen, moaren en veurwoarden, mor onveurwoardelke Laifde. Dou zien voader hom zo laifdevol in muite kwam, paasde jongste zeun mor ain woord: “Voader”! Zo’n aigenste ervoaren kriegen ok aandre thoeskomers voak tegen wil en daank. Gain gezoes, mor open aarms deur lu, dij al zo lang wacht hebben. Dat bedoulde Jezus ok mit zien geliekenizzen te zeggen aan t volk, dat er veur open ston. “n Open haart, dat is aal wat telt!” Zunder genoa van onze hemelse Voader kommen we vervast veur n dichte deure, as we noa n tied van rondstrunen endelk besloeten weer op t Voaderhoes aan te goan.
