t Gezag van meester Durenkamp
Ik waas tien joar. Haile schoul ston klas aan klas ien strakke riegen opsteld op schoulplaain, zo as elke daag veurdat lezzen begonnen.
t Waas op legere schoul op t Hogelaand, ien t Marnegebied. Nait zomor n schoul, mor “De School met den Bijbel”. Op ons schoul waas Biebel t belangriekste bouk veur joen haile leven, veur alles wat joe deden.
Zo as altied ston noa ofloop van mirregpauze meester Durenkamp, ons hoofdmeester, op bovenste tree van stoup veur hoofdiengang. Zien ogen gingen riegen òf en zien blik bleef stief hangen bie n jong oet mien klas, Albert Vegter. Hoofdmeester raip hom noar veuren. Nog zai ik t veur mie.
Veur t front van haile schoul kreeg hai een filaaine oetbrander, n pak op pens en strafregels. En wat ducht joe woarom? Omdat hai filmsterploatjes bie hom had haar en aan ons zain loaten haar!
Zulfde dag nog het zien ol heer verhoal hoald bie meester Durenkamp, dij gain krimp gaf. Doarom schient Vegter aibels t bestuur nog op meesters gedrag aansproken te hemmen. Belangstellen veur wereldse zoaken, zo as teneel en film, mos allergloependst ofkeurd worden. Mor noa dij mirreg deurbrak n voader op schoul veur t eerst t vanzulfsprekend gezag van meester.
Of t ain mit t aander te moaken het, wait ik nait. Mor Albert zien pa mouk mit zien aksie dudelk dat meester onakseptoabel handeld haar. Ie kinnen ook zeggen dat hai n aandere sfeer ien gang zet het, ja zekerwoar waas hai aangever van n omslag.
Of meester Durenkamp dit nait mitmoaken kon of wol? Ien aals geval wer hai nait veul loader hoofd van n schoul aargens ien t Westen van t land.
