Speulhorn

Zèlng is laankwieleg. Ploatselk Belaang orgeneseert zulfs n breenstörmoavend. Zai goan kieken wat dij doaran veraandern kinnen. Mor is Zèlng echt wol zo laankwieleg? Gainain in dörp dij doarvan wait. Wat doar apmoal in nacht heergaait.

Nem noe kinderspeulploats an Dorigweg. Speulhörn. Dij speultoustellen, elkain denkt dat dij doar aaltied mor stoan blieven. Onverzeddelk op heur betonfondement. Van dag tou dag wachtend, stil en geheurzoam. Tou kinder kommen, op heur klimmen, op heur speulen.

Mor as dat noe ais nait zo is? In nacht as elkain sloapt klikken dij toustellen zok lös van heur betonfondement. Vroag nait hou dij dat doun, dij doun t. Lösklikt goan dij spanzaaiern. Dörp in.

Bie ingang staait n kinderzitje op stoalen springvere. Zai is lös, drokt zok òf, springt over riggel. Dorigweg uut en noar Boeskoolbaank. Mit veurpret en om eersterd energie kwiet te roaken springt zai doar zo tien moal overhìn. Hìn en weerom, hìn en weerom.

Haalfronde rode klimrik komt der achter tou. Minder ras, moar geliek zo groapeg om uut baand te klinstern. Mit twij poden op grond en twij poden in locht riggel over. Draaiend van pode op pode swingt hai deur nachtelk Zèlng. Òf en tou draait hai om zien azze perewette op ain pode.

Lutje huuske wentelt zok over gras. Kobbeltjeboitelt over riggel. Staait din recht, wentelt zok stroade over, en nog es en nog es. Groot en zwoar is glidskeboane. Mit muite sokkelt hai riggel over. Doddelt over stroade hìn dorp in.

Op Dörpsstroade vinden zai nander weerom. Doar is ok opins wupwap. Dij bliekt jechtege gangmoaker te wezen. Tapdaanzend op zain aine end doddelt hai rond. Hai stekt aandern an in zain aaltied sneller ritme. Zien sprangen weergaalmen in heur buzenstelsels. En zo kriegen zai apmoal dat aigenste gevuil: met mit wupwap. Krek zo fel en swingend worden as hai. Apmoal daanzen zai rock en roll. Geven zok doar hailemoal an over, hefteg en haartstochtelk. Ritmies hakkeln dij om ainander hìn, pakken schovvelnd ainander vaast en kliddern slenternd rond. Middel tussen heur wupwap. Onmuidboar mietert hai kinderzitje mit sprinkvere in locht. Vaangt heur galant weer op. Hoalt heur linksom en rechtsom onder laangs zok hìn.

Zai goan uut heur dak, dij toustellen. Moaken heur aigen te gekke feest met. En gainain dij t zugt. Allenneg mor kadden vlochten rap in stroeken. Van t gespaddel strulen stroalen kondenswotter van heur buzenstelsels òf. Blieven in plaskes op stroade liggen. Overaal swingen dij noar tou: Westerkaamp, Torenstroade, Hassebergerweg, Breetoenenweg. Waiten nait van opholden.

Nog uren goan zai deur. Daanzen al heur stiefhaid uut. Al heur tiedkörteghaid van aal dat indeloos waachten, doar op heur betonfondement in Speulhorn. Op t ind worden dij muid. Hompeln en strompeln weerom noar heur speultoen. Riggel over. Klikken zok weer vaast. En stoan doar din weer doodstil. In t ind kommen ok wupwap en kinderzitje mit springvere binnen. Zai zain der verlaifd en hister uut. Zellen dij nog geliek soam wup moakt hebben?

Din worden Zèlngners wakker. Klaiden zok an, loaten hond uut. Lopen aaltied zulfde rondje. Zain dat aal nog t zulfde stoat as gustern. Ok speultoustellen. Wat is t doch laankwieleg in dorp. Nooit gaait der ais wat heer.

Dij mouten ais waiten!