Scheuvellopen op brak ies
k Zel zonen beudel van krapaan aachte west wezen, dou k mit mien kammeroaden scheuvels under knupde om achterwieke te goan verkennen. Zokswat deden we wel voaker, as tied en ies der veur was. Doudestieds wazzen woarschienlek winters kolder as vandoag de dag.
Bie mie konnen we sikkom elk joar d’iezers under binden om n poar weke lang hail wat kilometers te moaken op wieken en kenoalen in buurte. Göngen noar en van school op scheuvels en haren noa schooltied amperan tied om thoes wat te eten. Haile dag zaten we op t ies en aimelden mesters en juvvers tot vervelens tou om n dagke iesvrij. Tot soavends aacht uur scheuvelden we op t heufdkenoal.
Kom der nou es om! Niks mis mit n raaiske op zoaterdagmörgen, zol je zeggen, doch luip t dij raaize wat aans as aans. Veur mie luip t op n Mekkoa’s raaize oet! Op achterwieke pebaaierden we op n aansloetend kenoal te komen. n Duker in weg muik n stokje klunen noodzoakelk. Klouk as k was, nam k t òf te leggen pad wat al te krap. Bleef op t ies tot t nait wieder göng.
Paitje veuraan as k was, scheuvelde dizze kloukhaans wat veuroet, mor k was nait bedocht op t bomies under snij. Veurdat k der op bedocht was, zat k al tot haals tou in bragel. Mit verainde krachten hebben jongs mie der weer oet hoald. Zat under drek en was sjompenat vanzölf. Goie road was duur! Noa wat rezenaaiern wazzen we der oet. Weeromraaize mos k zo haard meuglek scheuveln. Dat vuil aans nait tou. Boksem en jaze stonden in vraiskolde in n klapscheet stief oet. Deurlopers vroren aan gimmestiekschounen vast. Veters mozzen ze bie aankomst mit t Drents woapen lössnieden.
Vouten wazzen mie zowat òfvroren. Man, man wat haar k kold. As mien kammeroaden mie nait holpen haren, was k vervast nait meer leventeg thoes komen. Aal mit aal gain ervoaren om over noar hoes te schrieven. Wat n konsternoatsie doar! Moeke het mie votdoadelk oetklaaid en in tobbe stopt. Vandoar verhoesde k, noa wat waarme sokkeloademelk, lebendeg op berre. Gelokkeg heb k er gain noadelege gevolgen van undervonden. Volgende dag zat k weer broaf in school. Doch zel k dit oaventuur nait makkelk vergeten. Loater mog k pas op t ies, as mien voader t zölf goudkeurd har en dat stak hom wel krek. k Haar mien leske wel leerd.
Jonkhaid wait op t heden bie winterdag ja nait hou rad ze weer thoes en achter computer of veur wiedkieker komen mouten. Of ze goan n zetje noar n overdekte ‘waarme’ iesboan. t Is boeten deure ja zo allergloependste kold! Kinder binnen tegenswoordeg bliekboar slim hiepkonterg.
