Scheemtermeer

Mien haile jeugd heb k deurbrocht in Scheemtermeer. n Klaain streekje dichtbie strokartonfebriek “De Toekomst”. Wie wonen toun in n hoeske van febriek, aan Oosthoffloane. Aalmoal hoezen dij bie febriek heurden. t Was n zunege boudel in dij tied. Der wer zulfs op toukeken dat wie soavends nait te laank licht aanhadden. Zotterdoags ging om tien uur licht eem oet. Din wuir stroom overzet op 110v van Veendam. Doar haren wie waaineg last van, allain lampen gingen eem oet, mor radio nait. Dat was zo’n distributieding. Mien pa luusterde geern noar t nijs en woar e ook gek op was, was noar meziek luustern. k Wuir older. k Wait nog goud dat mien zus Niessien mie noar bewoarschoule brocht.

t Ging nait vanzulfs. k Wol nait van hoes. Mor k mos der toch aan geleuven. Bie heur achterop fietse noar Scheemde. Juf Spelde ston mie al op te wachten, net of k ofleverd wuir, dat vuilde krek zo. Om der te kommen mozzen wie aan t Achterloantje wezen. Doar konnen wie drin. Troanen biggelden mie over waange. Doar zat k din midden in klas mit aalmoal vrumde kinder om mie hin. t Het wel n weke duurd veur dat k alles op stee haar. Boeten speulen vond k prachteg. In n grode zaandbak mit n wupwap en zooiboois. Konst die teminnent goud bewegen. Tied verstreek. Bie lutjen aan laip bewoarschoule noar n ènne. Gelukkeg was legere schoule in t zulfde gebaauw. Juf Hassing (Jaintje) het mie lezen en schrieven bie brocht. Zai kon ook goud veurlezen. En in twaaide klas kwam k bie meester Pruisman. t Was ook zien twaide joar bie ons op schoule. k Zai hom nog aankommen op zien plof, n Kaptein Mobylette. Hai haar altied n leren jaze aan en as plof t nait dee, haar e swait veur de kop. Mor verder was hai n hail schiere kerel. Veul van leerd. k Heb tot de viefde klas bie hom zeten. Elke vraidagmiddag las e veur. Meroakels spannende verhoalen. En nait vergeten, in laange riege mit hom noar Eexte. Doar gaf e gimmestiekles in n ol lokoal.
Vanof bewoarschoule was k kammeroad mit Harry Franken. k Erinner mie nog goud dat Harry n bain brak bie hom veur t hoes. Dat was nog veur dat e noar bewoarschoule ging. t Leste joar op legere schoule was k bie meester Boelkens. Zien bienoam was “Bolle”, overnomen van zien pa heb k heurd. Hai was n beetje kört veur de kop, mor wel n goje meester. Wie hebben veul van hom leerd. Hai was nait te beroerd ons meer te leren as in boukjes ston. Noast mie in baanke zat Jan Groenbroek. Soamen, hai meer as ik, hemmen wie n “schoulkraante” oetgeven. Hai muik de tekst en ik taikende der wat bie. Meschain het wel wat mit Toal en Taiken te doun, wel zelt zeggen. Boeten schoule waren wie veul aan t pingeln mit n bale. In t ziestroatje tussen Kolkema en Vedder was n geragedeure dij as doel dainst dee. Veul lewaai, moar Jan en ik hebben der goud schaiten leerd op doel. Toun legere schoule der op zat, kreeg k weer zo’n leeg gevuil in t lief as bie begun van bewoarschoule. n Stokje onwizze meschain.