Project Niks?
Op 9 september was mien vattegste verjoardag. k Heb gain huus vol volk had, k heb t aargens aans vierd. Hoaren schient n goud stee te wezen om sproakmoakende feesten te geven. Dat leek mie wel wat veur mien aigen ‘Project Niks’. Nou ja … niks … nuim dat moar es niks! Vatteg joar is biezunder genog om der meer van te moaken as n gewone verjoardag. En mien feest was ook zeker nait niks.
Bie restaurant De Twee Provinciën haar k n schier stee vonden om t feest te holden. Op dit doalders ploatske aan t Potjewoldsemeer haar k tien gasten nuigd veur n etentje, noatied kwammen der twinteg lu bie veur n groter feest mit n zeupke, n hapje en Grunneger meziek. Veur de meziek haar k ain van de beste Grunneger artiesten vroagd (wel zel dat wezen?) en dij het joa zegd.
![](https://dideldom.nu/wp-content/uploads/2023/08/afbeelding-90.png)
Erwin de Vries is te bouken veur huuskoamerconcerten. Hai mag geern veur leutje gezelschoppen optreden, zo kin e stoef bie zien pebliek kommen en direct contact mit lu moaken. Wel kon nou beter mien feest opluustern? k Haar hom mit droadpost n berichie stuurd om te vroagen wat de meugelkheden waren en k kreeg al gaauw n reaksie dat t deurgoan kon. In n optreden van twijmoal zowat n uur speulde en zong hai mit zien pazzipanten Christof Bauwens en Bruno Brands de schierste laidjes en grootste hits uut zien repertoire. k Haar vroagd of e in de speullieste n poar nummers opnemen wol dij k zulf geern heuren mag. Dat kon ook en zo wos k zeker dat e laidjes as ‘Wind’, ‘Vandoage’ en ‘Grunneger Wicht’ zingen ging. Ik haar Erwin al n poar keer in t theoater zain en kon zien kwaliteiten as zanger en entertainer al. t Was slim schier om dat nou es van zo stoefbie mit te moaken. Mien gasten waren positief verrast, dat ik zo’n Grunneger topartiest regeld haar en dat dij ook zo goud is. n Poar gasten willen nou ook es noar t theoater om hom doar te zain. k Heb ook schiere kedo’s kregen: kedokoarten van bol.com en veur t theoater (woar zel k es hìn goan?), geld, n madde mit streekproducten, draank, sokkeloatjes en n rondvoart in Stad. As bedankje en herinnern heb k aan ale gasten t jongste album van Erwin de Vries ‘Leef t Leven’ geven. De bosschop van dit album is, dat je t leven koestern (‘beklokkern’) mouten, op wat veur menaaier den ook. En doar mout je nait tot joen vattegste mit wachten.
Op de dag zulf heb k ook veul koarten kregen en felesitoatsies op Facebook en Twitter. Aal mit aal is mien vattegste verjoardag is n feest worden dij k mie nog laank herinnern kin.