n Veendammer volksverhoezen

t Was in t joar 1975… t Eerste weekend in september. Mien pa en ik wachten mit spannen op voetbaloetsloagen. As grode aanhangers van SC Veendam wazzen wie benijd noar d’oetslag van bekerwedstried tussen Fortuna Sittard en de speulers van de Lange Leegte. Der was dou nog gain mobieltje, gain internet en teletekst op tillevisie. Nee, je luusterde noar ‘Langs de Lijn’ op radio mit voetbaloetsloagen, lezen deur Frits van Turenhout, wereldberoemd in Nederland deur zien mooie oetsproak van ‘nulnul’. En doar kommen d’oetsloagen…..en din…. Fortuna Sittard-Veendam 3 (oh, nee he)-5! Hoera, wie hebben wonnen. Nou moar hopen op n mooie tegenstander en n toeswedstried. Mor t löt besliste aans: t wuir Feyenoord-Veendam in Rötterdam. Dunderdags dernoa verscheen in weekkraant De Veendammer n oproup van de fanclub dat zai n raaize organizeren wollen op 12 oktober noar de Kuip. En nait mit bus, nee mit traain. Dat was nog ais n goud plan. Traainstation was der nog, t emplacement ook nog, din der was nog oareg wat goedernvervoer over dat spoor. Nou allain nog de vroag of de NS n traain beschikboar geven wollen op dij dag. En was der wel genog belangstellen veur…. Mien pa en ik wollen ons geliek opgeven.
Den gong der weer n traain over t traject Veendam-Stad, zoas joaren leden -tot 1953deur de vrougere N.O.L.S., de Noordoosterlocaalspoorwegmij. Mien pa haar dou in dij tied n volkstoentje stoefbie station Meeden/Muntendam. As kind gong k in zummer voak mit en k wos dat der rond zeuven uur n goederntraain richten Zuudbrouk gong. Ast den sikkom zo wied was, runde ik deur t hoge gras diek op en loerde of traain der aal aan kwam. Voak kreeg k din n poar sinten mit om dij op rails te leggen. As train veurbie was mit zien 30, 40 woagens runde ik weer noar t spoor om mien platslepen sinten en stuvers te pakken en zo was mien laifde veur traainen geboren.

Ik wol geern traainmachinist worren. Wie haren dou toes gain auto, moar n ‘plof’. Mor dat leste is nou n Spartamatic. Mor k bin aan dagdreumen roakt. Nou weer noar t joar 1975. In ‘De Veendammer’ kwam elke week n stukje over raais noar Rötterdam. De fanclub was aal drok mit de veurberaidens aan gang en wie wazzen benijd of der genog supporters wazzen om n traain te regeln. Genog????? t Luip störm! Honderden minsen wazzen enthousiast en nait allain oet Veendam, nee oet de haile pervinsie. En dou…was der n traain regeld deur de NS. Mor ja, der haren zok zoveul minsen opgeven, dij konnen nait in ain traain, nee der mozzen der twij kommen. Laifst 1500(!) minsen haren zok opgeven en dij wazzen der op 12 oktober aalmoal. De landelke pers haar der ook van heurd en in de Telegraaf ston n artikel over “De Veendammer Volksverhuizing”. Mien pa en ik zaten in d’eerste en laangste traain, dij haar blaauwe rietugen en wuir trokken deur diesellokomotieven en wuir “Fanclubexpress” nuimd. Twijde traain was de in dij tied bekende gele stoptraain, ook in dieseloetvoern, den der was in dij streek nog gain elektrieke bovenlaiden. Wie gongen links in traain zitten en kwammen zo langs de streek woar mien pa eerder zien volkstoentje haar. Ook gongen der 16 spoorwegrechercheurs mit. Wat n geweldege dag was t. n Traainraais, in de Kuip n voetbalwedstried mitmoaken en feestvieren mit zo’n 1500 supporters. De ‘Langeleegtejongs’ haren zok goud weerd, mor deur n groot slotoffensief van Feyenoord wuir d’oetslag 5-0. Mor…..t verdrait van t verlais duurde nait laank en der wuir weer zongen, laagd, eten en dronken in traain. Wie haren zulm aal wat eten en drinken mit nomen, mor d’obers haren in onze traain 500 stoetjes, 500 bierworstjes, 1500 blikjes frisdraank, 1200 bekers kovvie en 3000 blikjes bier verkocht. Mor…..d’Oostgrunnegers hebben zok hail netjes gedroagen, kom der nou mor ais om. d’Ainege wanklank dij der was, was dat der aine bie Hoogezand aan noodrem trok, mor dat dee hai allain mor omdat machinist doar vergat te stoppen. En doarnoa was t weer stil bie station Veendam. Totdat joaren loater de S.T.A.R. kwam mit n museumspoorlien richten Stadskenoal. Nou is der n plan
om n echte traainverbinnen mit personenvervoer te moaken tussen Veendam en Stad Zuudbrouk. En dat zel al in maai wezen. Hopelk lukt dat aalmoal. Joa….en traainmachinist bin k nait worren. Dou k 18 was, dee ik mien ‘volksverhoezen’ van Veendam noar Hilversum/Amsterdam en ook nou raais ik aaltied mit traain. k Bin in de raaiswereld trechte kommen en verkoop nou deur t regeln van zoakenraaizen – hou ken t ook aans – traainkoartjes aan onze klanten. Bieveurbeeld koartjes van de Thalys, Eurostar, ICE en wel wait, meschain ook wel binnenkört koartjes van Arriva noar Veendam.
Ik wins den ook de gemainte Veendam, pervinsie en Arriva veul sukses hiermit en dat der din veul Grunnegers en ‘NaitGrunnegers’ gebruuk moaken kennen van dizze spoorlien en zo genieten kennen van ons mooie Grunneger laand.