Lutje mantjes

Dij kwamen in de naacht, mit n onòfzainboare stoede campers. Kentaikenploaten van n onbekend laand, in onbegriepelke leddertaikens. Mit heur campers perkeerden zie de Navoloan vol, de Olde Maart, de perkeerterraainen rond Albert Heijn, Geert Teis, t Roadhuusplaain, Lilienthalplaain.
Uut de campers kwamen lutje donkere mantjes, gespierd en mit koale koppen, en slovende vraauwtjes. Heur gemak deden zie in de plantsoenen, tegen de bomen, bie t Poolse bevraidensmonument. Zie gingen sloapen in heur perkeerde campers.
t Is zotterdag. Smörns vroug willen de maartkooplu heur kroam beveurroaden. Dij campers stoan in de wege. Zie rabbeln an, bomzen op de campers, roupen dat dij oprötten mouten. Plietsie der bie. De lutje mantjes verstoan niks, begriepen niks. Dij binnen stòrreg, in heur sloap steurd. De diskussie wordt handtastelk, mor van ale kaanden stromen aandre lutje mantjes tou. Ok stòrreg en in heur sloap steurd. Mor zie binnen staark en nemen t veur nkander op. Plietsie en maartkooplu stoan tegenover n overmacht. De campers blieven woar dij stoan.
Winkels goan open en t zotterdagpebliek stroomt tou. Te minzent, dat dochten dij te doun. Mor gainain kin zien auto kwiet. Weer glìnne woorden, ragen, handtastelkheden. De lutje mantjes binnen wakker, hebben toaveltjes en stoulen uutklapt en zitten an de kovvie. Lu binden in as zie zain hou veul t er binnen, dat zie staark binnen, n overmacht.
De börgmeester, man van verzin en vrundelke woorden, dout n pogen. De lutje mantjes kloppen hom op de scholder, geven hom n plakke stoet mit knoflooksaloami en n tas van heur staarke kovvie. Verstoan of begriepen doun zie hom nait. Vrundelk mor ongetroost gaait de börgmeester mor weer vot.
Tussentied lopt de zotterdagmaart op niks uut. Binnen de klanten vergrèld, de winkeliers vergrèld, de maartkooplu vergrèld. De lutje mantjes vinden dat t tied is veur mirregeten. Gaauw vollen rook en roek van heur barbekjoes de locht. Der komt bier op toavel en lutje glaskes mit n hoog perzentoazje alkohol. t Wordt noflek, oorverdovende meziek, doen brollen dij altied haarder met. De mantjes goan daanzen in n kring, de aarms om nkanders scholders. Zie maken radsloagen en aandre akroboatische tornen. Stemmen zit der bie heur goud in. En as t even teveul wordt pizzen, poepen en kotsen zie dat uut in de plantsoenen.
Börgmeester en plietsie willen opschoalen. ME der bie en genog materioal om aal dij campers vot te slorren. Mor zuk wat regeln op t Knoal gaait langzoam, wis in te wiekend. Veul langzoamer as bie n boerenpertest in Den Hoag.
De mantjes feestjen deur tot daip in de naacht tou. De Knoalsters boalen, kieken wol uut, holden heur wichter thuus. Kankern op de plietsie dij niks dut. Op zundag predeken de veurgangers in de kerken wat over noastenlaifde en verdroagzoamhaid. t Kerkvolk loat heur mor proaten.
Mor loat in de mirreg, as zie goud uutsloapen binnen noa heur feest, breken de lutje mantjes op. Mit achterloaten van baargen òfval rieden heur campers vot t Knoal uut. De mensken kinnen weer perkeren en in vree heur bosschoppen doun. Wol is t tussentied moandag en den binnen veul winkels tou.