Lötterij

t Was krek as op tv. Dure auto stopt veur heur huuske an de Werfstroade. Aine in n duur pak mit n bos bloumen. En zuk n groot schuufkevort. Zie mocht t keton teveurschien trekken mit doarop € 100.000,–. Lötterij wonnen. Zie kin nog net veurkommen dat de man n konfettibom òfstekt. Zie wil t stille holden, noabers huiven der niks van te waiten.
Noabers waiten t doch wol. Filesetaaiern heur, en zie is ok blied. Minder is dat summege noabers en vèrre femilieleden dij zie nog nooit zain het, anschellen. Willen helpen, waarken in huus of heur admenestroatsie. Dij waarkt zie de deure uut, dij binnen allinneg mor oet op heur sinten.
Ainmoal in heur levent het zie gelok. En dat loat zie zok nait òftjoenen. Na ja, zie mout nog twinneg persìnt kaansspelbelasten betoalen. Dij anslag van Belastendainst betoalt zie gewoon. Ok ansloagen huurtouslag en zörgtouslag. Dij mout zie weerom betoalen omreden dat heur inkomen veraandert is. Betoal mor, blieft nog genog over.
Cruise? Weerldraaize moaken? k Heb altied al noar Amerikoa wild. Noar reservoaten, kieken hou d’ Indioanen doar leven. En noe heb k geld genog.
Deurbel klingelt deur heur plannen hìn. n Dikke blonde vraauw en n jongkerel. Sozioal resjersjeurs van de gemainde Knoal. Dailen heur mit dat dij kommen binnen omreden dat zie oanen dat mevraauw onrechtmoateg uutkeren van de gemainde ontvangt. Dat lötterijgeld haar zie melden mouten. Mit dat geld kin zie in heur aigen bestoan veurzain, dus uutkeren wordt introkken.
Mor dat geld is doch van mie? k Heb t doch eerlek wonnen? Doch niks onrechts doan? Mor regels binnen regels. Heur uutkeren vaalt vot, toukommende tied mout zie lötterijgeld uutgeven an huur, wodder, gas en licht, bosschoppen. Krek zo beknepen leven as zie altied al deed. En as lötterijgeld vot is mag zie weerkommen bij de gemainde. Vot is cruise noar Amerika. Vot is heur gelok. Zuk n lötterij moakt dien levent nait aans.