Laifde

Zien haand… het dij van heur
past zo mooi inelkoar
ze het n mooie kleur
net… wassen blank ivoor

heur heufd… ligt op zien scholder
twij grieze koppies noast elkoar
wer’d soamen older
binnen ook al zo laank… bie mekoar

hai striekt heur over hoaren
dat mooie… zulvergries
fluusterd wat laive woorden
ben mit die… zo wies

hai roekt aan heur
lavendel… limoen
heur lievelingsgeur
geft heur zacht… een zoen

hai bekiekt heur lichoam
zo klain… zo smal
laifde is noeit overgoan
al zo laank leden… dat ze zien hart stal

toun… dat donkere laange hoar
twij bliede ogen
dij tied… bie mekoar
dij is omvlogen

moar… ze is zo kold
dat is wat hom begroot
as hai heur beter vasthold
wait er… zien wiefke… dij is dood.