Knelis

Knelis Haaijer höng aan latten. t Volk mummelde, dat ze dat joaren leden al aankomen zagen. Gruide ja op veur galg en rad. Docht dat wereld ain groot speulpelais was. Centen gruiden in t kamnet en t waark was veur de dommen.
Vuilde hom wied verheven boven t klootjesvolk, dat veur n haalve rooie cent in waige legen har en gain oetzicht kreeg op bedere tieden. n Wiesneus eerste klas, woar schienboar gain vraauwlubloud in zat. Haar aan zien moeke zoaleger bliekboar meer as genogt. Aander doames oet t dörp wazzen hom, noar t scheen, veuls te min. Kneep kadde laiver in t duuster. Bie tied en wiel hoalde hai zien gerief wel in Stad, wer der flusterd. Buusgeld kreeg e ja zat. Zien ollu hadden hom achterof beder Knelis Naaijer nuimen kind, of Knelis Repel, din har e teminzent zien noam nog eer aandoan. Het in amperaan tien joar t duroabel spul van zien ol heer Berend versloerd en verhoerd. Haar noa t ‘hemeln’ van Berend, dij körts doarveur zien oldske, Knelis moeke, noar t kerkhof brocht har, t schienboar nait recht verwaarken kind. Was aal stuur in zien bestoan kwiet. Dee woar hai zinneghaid aan har en dat was nait veul. Zien moeke was alles veur hom west. As ainegst kind strontverwend en aaltied noar ogen keken. Ons jong haar kost veur t kaauwen en t veuroetzicht aan t geld in t kamnet beloofde hom n golden toukomst. t Waark lag hom aans nait. Haar ledder W van waarken in paalm van zien haand nooit lezen. Knelis en zwait verdruigen nkander ja nait. Oet verdrait, om t verlais van zien boakens, kreeg Knelis fles brandewien oet kaaste, veur n klokske dij hom beder smoakte as aal tebletten van heur hoesdokter. Zeupkes smoakten noar meer, van dij gevolgen Knelis flezze sikkom voaker in haand kreeg as zien ballaster of laaide van t peerd. t Levent brocht veur hom mor n schietbeetje dieverdoatsie meer. Dizze vatteger mos aans wel aarg veul dörst had hebben, as hai in zo’n körde tied n kostboare ploatse noar zien barrebiesies helpen kon. Volk wol nait meer bie hom waarken. Aarbaaiders mozzen mor zain, wat ze doun konden. Sturing was der nait meer. Boer was haile dag aan de flotter en mos n traauwe bezuiker wezen van bepoalde vraauwlu in Stad, dij heur liggend perbaaierden overende te holden.
n Echtpoar oet Waarvum het ploatse opkocht en was der slim wies mit en zo t zoch aanzain luit, kregen ze t spul weer nuver aan loop. Knelis trok in bie n olde ainspaanster oet Beem. Was in Grunnen bliekboar oetspeuld, nou zien porterfulie nait meer zo dik was. Och en in t duuster binnen aal kadden ja ainder. Knelis was der op bouldag liek oetspröngen. Haar allent wat kleroazie en n noagel overholden om t gat mit te kraben. Wat t wicht in zo’n verlopen sujet zain haar? Zel wel n nuver passend lid veur heur potje west wezen?

8 juli 2008