Kennis der Natuur
Op schoul was elke week n uur
Een les in “kennis der natuur”.
Omdat dat zo vervelend was
Sluip maistied ook de haalve klas.
De aander helft dee kaddekwoad
En meester wos zuk voak gain road.
Hou mooi en duudlek hai t ook zee
En hou of hai zien best ook dee,
Het huilp hom allemoal gain spier
Tou jongens, zee hai, kiek ains hier.
Wie hadden het over peerd en kou
En wazzen nou net aan d’ezel tou.
Kloas Kotjes zit mit leutje Pait
Op leste baank, mor luusterd nait
Mor kikt mor aal noar boeten tou.
Tou Kloas, zegt meester, lot dat nou,
As ik hier over d’ezel proat
Din kikst noar mie, en nait op stroat.