t Verboden laid

Doar was dat minleke jonkie,
Dat om n boodschap ging,
Deur moagere widde lippen
Dat dodemanslaidje zong. (2x)

Van t neie graf op t kerkhof
Dat neurden dei lippen aal deur…
Zien Moeke haar hom t verboden
Zo schrienend was t veur heur. (2x)

t Is bangeg donker in t veenlaand,
De haarstege regenwind jacht.
De oele ropt angsteg in t lege,
De oakster op dak dei laacht. (2x)

Deur rusken soest t as n zuchten
Om dodemanslaaidje hen,
En t is of dodemans-saaize
Snidt deur de toeven hen. (2x)

Stil glidt van glibberge wale
De neeurende schimpie – och Heer –
Zacht kronkelt t woater in törfput
En slut zuk krinkelend weer. (2x)

Doar is dat verwezen vrauchie,
Dei wit aan t venster staait.
De mond in daipe voln
Dei… neurt t verboden laid. (2x)

Dit laid is schreven deur Geert Teis, van t Knoal.