Hawaii

Kilima Hawaiians: altied aal was hai glìn west op Hawaimeziek. Op rommentiek van de Stille Zuudzee, widde paalmstranden, Hula-meledieen. Op zwiemelnd geluud van de Hawaigetaar mit dij laange uuthoalen woaropst zo schier votswaarmen kinst. Op beune haar hai zien reuzen verzoameld: grammevoonploaten, sinjeerde hoezen, avviesjes, programmoas. Zien vraauw haar altied òfkeer had van dizze hobby. “Wat moutst doch mit dij boudel?” Mor zai was noe uut tied kommen. Hai zugt zien kaans schoon: k goa dij raaize van mien levent moaken. k Goa noar Hawaii.
In zien huuske op de Zandbaarge an t Troapelknoal, onder t viadukt van de N366, mit dag en naacht ruus van t verkeer, haar hai joaren laang spoard. Sinten bezied legd veur t vlaigticket. Eerst van zien verdainste bie d’eerpelmeelfebriek en as dij mederneseerde van zien uutkeren. Noe van zien penzioun. Der binnen genog sinten veur dij raaize. Raaisbero op t Knoal het t vlaigticket rezerveerd, dij nuvere vraauw van de baank regelt de betoalen. Zie het hom zolfs doarover opbeld. Van t vlaigveld Flughafen Düsseldorf zel hai op de jumbojet stappen en mit wat tussenlaandens ankommen op zien dreumaailand Hawaii.
Mor noe zit hai opins in n Duuts hotel. Buten dichte dook en oorverdovend drok autoverkeer. Achter t dubbeld glaas van zien koamer heurt hai t hoast nait. Zojuust het hai ontdekt dat dij nuvere vraauw van de baank doar hailndaal nait waarkt. Zien spoarsinten binnen vot, zien baankreken leeg. Gain vlaigticket want der is niks betoald.
t Retro leeslaampje gift nait genog licht om de schiemer te verdrieven. Ledders in de kraande kommen hoast nait lös van t pampier, hai kin dij naauw lezen. Verwaarmen staait veul te hoog, t binnenklemoat is tot houstens tou uutdreugd. An de gevel vloept n luchtrekloame an en uut, aal ogenblik n poarse hoakse houke op de mure.
t Is t perfekte dekoor veur hou hai zok vuilt: maizeg, zien sinten vot, zien glaanzend veuruutzicht vot , Hawaii vot. Hai wait t nait meer, kin naargens hìn. As hai de tv anklikt is doar enkeld n Schlagerfestival, wat aans as dat gift d’òfstaandsbedainen nait vrai. Duutse hoempa, niks van Hawaii. Mörgen mor weerom noar de Zandbaarge, noar zien huuske onder t viadukt van de N366. Kieken of hai nog wat van zien sinten weerom kriegen kin. Aans wait hai t ok nait meer.