Haardriederij op scheuvels te Winneweer

As k ainmoal ais op Damsterdaip,
Dou t n bakstain vroor, op scheuvels laip,
Zag ik d’r minnig jonge borst
Doar swieren op dij gladde korst;
Zag ik d’r minnig jonge kwaant
Mit zien wichie aal aan de haand;
Zo zag ik haile riegen goan,
Soms ook n belslee op de boan!

Zo zag k neef Haarm ook op t daip;
Hai vroug mie of ik mit hom laip
Noa Winneweer; zo as men zee,
Den zol men doar mit peerd en slee
Aan t droaven goan. “Joa, dat wik zain,
En twij gaait mooier as allain;
Kom, hol moar vaast!” Wie schoten deur…
Op t ies wazzen wie twij hachies, heur!

Wie laipen vot en streken deur
En keken noar gain gat of scheur.
Nog n streek of wat, doar wazzen wie
In Winneweer. – Doar zee men mie,
Dat t nait mat belslee worden zol,
Maar dat men aanders lopen wol:
n Man mat n vrouwmins achteraan;
Aacht poar; zuks, jong, dat haandde Jaan.

Men zol juust net begunnen goan,
En t eerste poar ston kloar op boan.
De vrauw1u mit heur buizen oet,
In onderrok en zunder schoet.
Doar goan ze hin! Wat gaait t er deur!
“Dij op de linkerzied bin veur.”
“Nait, Jaan, dij op de rechterzied,
Dij binnen veur; dij winnen t wied!”

“Nou, Haarm, nou kiek, dij dikke maaid
Verlust heur rok, moar toch, het gaait
D’r moar om deur. Dat is n vegerd, heur!
Dij gaait d’r mit de pries van deur.
Nou schaaiden ze eerst wat oet mit lopen:
Kom, zel wie nou n zeupke kopen?”
“Komaan den: heila, kastelaain,
Mie n glas pons en Haarm ook ain!”

“Kom, Haarm, nou wil wie weer noa boan”,
“Joa, Jaan, moar t lopen is al doan.
Dij dikke maaid, dij het de pries;
Dat is n boas op t scheuvelies!”
“Nou wivve nog n zeupke kopen,
En din moar gauw noar hoes tou lopen.
Kiek Haarm, dij jongs en wichter doar,
Dij schoaren zok al bie mekoar.”

Wie legden t oarig driftig aan:
De daauw ston op de rug van Jaan.
En t swait laip Haarm bie wangen deel!
Dou k thoes kwam, at ik n goud stuk meel.
Nou wil k noa ber, mien wief dij wacht )
Al n naalf uur laank, k wens goie nacht! ) bis

Tekst: A. Kuipers.

Meer van t zulfde:

Ploats hier joen reactie op dit stòkje, de nijsten kinnen ie lezen op de Thoesbladzie. Algemaine reacties geern op t Prikbord.

Het e-mailadres wordt niet gepubliceerd. Vereiste velden zijn gemarkeerd met *

Achtergrond info:

Olle en nait zo olle laidjes.

Kenje dat, der spoukt joe n laidje deur d’kop mor ie waiten nait meer hou t wieder was?
Meschien staait e hieronder.
Komen je hom nait tegen? Even sturen en wie zetten hom der bie.

E-mail bie wat nijs?