Fietse

Hai staait der al te minzent n joar. Schuun wegzet teugen t beton van de bushaalte in d’heeg laangs t Oostende. De manlu van Afeer lieten hom stoan, hebben der omheer maaid. Tusken en achter de spoaken staait t gras huzenhoog. De fietse op slöt, kedde legt der hailemoal òf, spadderbred veur haangt op haalfzeuven, ain haarde en ain ledege band. Enkeld nog goud veur old iesder, veur de sleup.
Dus nait dinken dat ain dag aine uut de bus stapt, de fietse van t slöt klikt en der op votriedt. Dat hai doar nog staait is noaloateg. Plietsie of gemainde hebben der gain tied, gain prioretaait veur. Hou is hai doar ooit te vlocht kommen? k Perbaaier mie t veur te stellen.
Vedde party, staait op Snapchat. Aargens in Blijham of zo. Zeuventien het der wol zin in. Elkain nuimt hom zo, nait om reden dat hai 17 is want dat is hai nait. Op nummer 17 woont want doar woont hai nait. Hai wait nait woarom, elkain nuimt hom zo.
Van Buldog heurt hai dat dij der ok hin gaait. En Buldog het n auto, dus kin k mooi metrieden. Hai is wol n goie gozer. Moust allinneg zörgen gain trouble mit hom te kriegen. Teugen zien muscles legst t òf.
As hai instapt zugt hai ok nog twij chicks zitten. Diedeldee kent hai wol. Zuk ain ontwiekend typje. Op fotos is heur gezicht altied aargens achter wegvallen. Hai wait nait wat hai van heur dinken mout. Mysterious.
En Gansje. t Liekt der op dat dij mit Buldog is. Zie zit noast hom, n bietje spekkeg. Buldog nuimt heur poedie.
Zie rieden Grunnen uut. Op d’A7 trapt Buldog plankgas. Blijham, gain idee woar dat is. Meschain aargens in de polder achter Winschoot. Google Maps wait beschaaid, legt n dikke blaauwe liene over t schaarm. t Ainegste wat zie doun huiven is dij volgen.
Mor Google Maps wait nait dat d’òfslag Winschoot tou is. Hai roupt n aantal moalen “keer om” en korregaaiert den noar de volgende òfslag tou. Doar is t baalkeduuster. Zie rieden in n uutstorven butengebied. “In the middle of nowhere” mommelt Gansje. “Mit kraanden touplakt” zegt Buldog. Mor laangs al dij onbekende landwegjes kommen zie den in t ènd doch in Blijham. Doar zigzaggen zie deur laankwielege woonstroaden. Berieken de Beukenloane. En verder is t piece of cake: op t geluud òfgoan.
Gansje mout pizzen. Zie mag ansluten in de wachtriege veur de dixies. De aandern lopen deur t terraain op. Grèlle laampen in heur gezicht, de party is al goud an de gaang. n Dainende minsenmassa golft met mit deurdringende shockwaves van housemeziek. Buldog gift hom doaran over. Gaait doadelk metswingen. En begunt overvluideg uut al zien pories te swaiten. Nadde plekken op zien borst, in zien oksels. Diedeldee is naargens meer te zain. Vot.
Zeuventien is nog nait zo ver. Hai mout zien draai nog vinden op dizze party, hai kent gainain. Joa Diedeldee, noe zugt hai heur. Hailemoal an d’aandre kaande daint zie met, heur aarms in de locht strekt. Far away, zie zel hom wol weer ontwieken. Hai wait t nait.
n Gast dij hom ansprekt. Over n pil dij die vleugels geft. Zuk ain te gekke experience hest nog nooit metmoakt. Apmoal bullshit, verkopersproat. As dij pil niks is is dij gast allaank vot. Mor doch, hai het wol verlet van n boost. Zeuventien koopt, slikt en de pil begunt zien geestverrumende trip deur t moag-daarmknoal.
Eerst vuilt hai niks. Enkeld n bietje daaimt, relaxed. Den worden scharen daiper, kleuren grèller. De meziek nimt zichtboare vörms an. Riffs zugt hai as vuurpielen de locht in schaiten en doar ontplovven. De grond onder zien vouten wordt n landschop van baargen en doalen. Mit doarin de bezuikers as spoekborries, totdat hai heur gezicht zugt. En laagt om heur kemieke gremassen, vedde dreld, stieve geboaren dij zoveul meer bedoulen. n Schatterlaag dij nait maind is.
Zeuventien deurzugt alens en is aalderwegens on the move, stille stoan kin hai nait meer. En as Jumping Jack Flash stoitert hai deur de minsenmassa. In de flow van de meziek nimt hai anlopen en springt hai, wordt aineg mit de sound. Sky high mit de riffs met om doar te ontplovven. Hai het de drive, kin nog uren deurgoan. Kin zien haile levent zo deurgoan.
Mor wat, aine holt hom teugen. Holt hom an de grond. t Is Diedeldee. Zie is teveurschien kommen, sloat heur aarms om hom hin. Nait meer ontwiekend, noe anhaankelk. Surprise surprise, Zeuventien kiekt heur verboasd an. Zugt dat zie ok hailemoal in de flow zit. Mor hai gaait haarder, zie kin hom never nooit bieholden. Loat hai zok opkeren? Nee. k Bin the king, the emperor. k Volg mien aigen leventspad. k Bin tomeloos, en wel mie nait bieholdt dij mout mor òfhoaken.
De haile naacht dendert de vedde party deur. Zeuventien vuilt gain muideghaid. Ok nait as de party op zien end lopt en aandre bezuikers langzoam votsieperen. Buldog en Gansje willen noar huus, vroagen of hai metgaait. Nee, vanzulf nait. Hai beleeft de party van zien levent, gainain gaait dij van hom òftjoenen. Loat heur mor noar huus goan, as dij doar verlet van hebben. k Kom op mien aigen power thuus. As k uutfeesd bin. As k der an tou bin.
Schochtern vaalt n eerste daglicht over t terraain. Music stops, roadies begunnen snoeren los te roppen, op te rollen, verstaarkers vot te droagen. Mor in Zeuventiens heufd stokt t nait. Doar dendert de drive deur. In dat ritme zweeft hai t terraain òf, de Beukenloane in. Al dij keurege hekjes, hegen, toentjes keren hom nait op. Zien experience is honderd moal groder, honderd moal mooier. k Loat mie nait begrinzen deur fucking heegjes en hekjes.
“Hee wat moutst doar? Vot doe, goa van mien grond òf”. n Dikke vint belkt noar hom. Net wakker, de hoagelse kop stekt glìn omhoog uut n badjazze. Zeuventien is allaank verder. Hai zweeft nog, zweeftt op zien aigen power weerom noar Grunnen. In giant leaps terog noar zien koamer.
Mor dat vaalt fies òf. t Moakt nait an mit al dij laankwielege lieke woonstroaden, al dij keurege toentjes. k Mout n fietse hebben. Hou krieg k n fietse? In de stad steelst der gewoon aine as doe zunder bist. Mor heer? Hai het gelok, zugt n fietse dij nait op slöt staait. n Olde rammelkaaste, t spadderbred veur haangt los. No problem, mit reuzen kracht springt Zeuventien der op en sprint vot. Hiermet kom k wol thuus.
In full swing peddelt hai de trappers rond en vlaigt deur t dörp. Mor den gaait hai opins deur zien trapper en komt mit zien borst haard op t stuur terecht. Fucking fietskedde, dij is der òflopen en slept over stroade. Shit!
Noe maarkt hai ok dat ain baand plat is. Wat n kloten old barrel is dit. Heerop hoalt hai Grunnen van zien leventsdoagen nait. Hai kiekt om zok hin. De woonstroaden bennen stopt. Veur hom legt n autoweg. Mit doar achter wied open laand. En der is n bushaalte.
Mit de bus noar huus dus. Zien fietse blieft stoan, schuun teugen de betonnen raande van d’haalte an. Hai klikt t slot tou. Mor de bus mout wol de goie kaande op goan. d’Haalte an d’overkaande van de weg. In n stroaltje stromt noe de wizzegheid vot uut Zeuventien, hai swaalkt de weg over. In ainen gierende banden, knaarzende rimmen. De bumper tikt hom net even an en staait den stille. n Rimspoor, deurdringende locht van schruid rubber. Oorverdovend bölken van de klakzon. As hai opkiekt staait de truck schaif over de weg. Hoagels flitsende koplaampen.
“Godverdomme vuile teringlijer! Kinst nait uutkieken! Haar k die sikkom doodreden godsamme!” Deur zien open roampje raagt de sjefeur hom d’huud vol. Hai het geliek. Zeuventien is hom rot schrokken. Ontnuchterd weerom in de waarklekhaid. Mit de schrik in de bainen staait hai an d’overkaande. Op de bus te wachten. In zien buutse vuilt hai t fietssleudeltje. Woarom heb k noe dij fietse op slöt zet? Dat olde barrel. En butendat: k kom heer doch nait meer weerom.