Eat sleep work train repeat
Grieze waarkdoagen riegen zok an ainander in bedrievengebaauw an Navoloan, woar ik mien ketoor heb. Buten rieden minsen karen bosschoppen van Jumbo noar heur auto. Binnen in kovviebaar, inliest an mure, tekst ‘Eat sleep work train repeat’. Haile dag tappen wie op toetsenbred en turen noar t schaarm. Tegen end van de dag, as k noar huus wil, tuug k mien beroloa open. Maank random readers, usb sticks, peperklips, penaizes en sleudels leggen apmoal hoasneuten. k Heb doar gain aandacht veur, goa noar huus.
Anderdaags. Hoasneuten hebben beroloa open drukt, liggen in n baarg om en onder t bero. Wat neuten rollen al noar deur. Wat is dit? t Steurt mie in mien retiene. Doch mor oprumen. Rol òfvalputen uut t boesterhok. Gaauw staait doar n riege puten vol mit hoasneuten. k Duuk weer onder in mien kompjoeter, vergeet neuten. Dij blieven knispern om mie hìn. k Wol t nait heuren.
Ain daag loater. Deur van mien ketoor krieg k al nait meer open. Hoasneuten vullen ain meter hoog t ketoor. En as k din endelk deur op gloep heb steurten dij zok greteg gaange in. Woadend deur hoasneuten beriek k mien bero. Gain tied verlaizen, mien drokke dagtoak achter t toutsenbred. Aandern in gebaauw: dij reageren krek zo, lopen om neuten hìn. Onderwegens noar heur bero, heur toutsenbred. Mit neuten hebben dij niks neudeg.
Hoasneuten waarken zok in tied gaange in. Bulten zok op tou baargen. En begunnen roatelnd van trappen omdeel te rollen. Wegens lewaai belt aine de kedukser. Op melden over hoasneuten reageert dij mit: “Kom noe, k loat mie nait in malen nemen.”
Omdeel versprieden neuten zok deur gaange. Verzoameln zok in aal hogere baargen. Deur deure schoeven zai kedowinkel/postegentschop binnen. Aine belt plietsie: kriegt ok weer ongeleuvege laagrege reaksie. k Hol mie stil: dij hebben nog nait deur dat t apmoal begunde in mien beroloa. Mie nog nait verantwoordelk stelt. Ansproakelk.
Anderdoags schoeven hoasneuten noar buten. Over stoup weg op. Onderwegens noar Jumbo verpulvern autos neuten tou nutella achtege brij. k Zit boven achter mien kompjoeter, drok aan t waark en k hol mie blind veur wat om mie hìn heergoat.
Neuten blieven strulen. Roezend en kloaternd vullen dij ingaang van ondergrondse pekeergerage. Op stroade liggen dij al n haalve meter dik, gain auto dij doar nog deur komt. Plietsie is doch kommen, zet rood witte riggels neer. Manlu van Wedeka Gruin en Infra bennen optrommeld, scheppen loadbakken vol hoasneuten.
En dij blieven kommen, dij neuten. Bedrokt waark k deur, dou asof t mie nait aangaait. t Is goud hoasneutenjoar, dat wait k. Mor dit?
