Droadproatn Facebook-interview mit Wat Aans!
Wat Aans! wuir bekend as rapduo, mit laidjes dij veuraal leken te goan over draank en poedies. Moar FiezeRik (Rik Baptist, Hoogezaand, 1988) en De Beunhoas (Teun Heuvel, t Zaandt, 1985) binnen hail veulziedege moakers van popmeziek mit meer inhold. Dizze zummer haren ze heur grootste hit tot zowied, in soamenwaarken mit zanger Michael Hoppentocht (Knoal, 1990) en ‘Proat toch Grunnegs mit mie’, noar t laid ‘Parijs’ van Kenny B. Is t duo nou n trio worden en hevve der weer n jonge Grunneger zanger bie? Kreuze wil es aan de proat mit de manlu van Wat Aans!
Rik, Teun en Michael, in veul streektoalen en dialecten binnen parodieën moakt op ‘Parijs’. Is dat n makkelke menaaier om n hit te scoren? “t Liekt makkelk, moar t was in eerste instantsie nait direct òfsproken dat dit n hit mos worden. Wie hadden t al n tiedje in de kop zitten om der wat mit te doun, Rik har zulfs al wat schreven en inzongen, moar der wer pas wat mit doan toun elkenaine ons berichten begon te sturen of wie ook n Grunneger variant wilden moaken. Pas toun hebben wie besloten om groter uut te pakken en de kont achter in de boksem te zetten om der n succes van probaaiern te moaken. Toun RTV Noord ook nog ains enthousiast was en de clip via Facebouk wilde uutbrengen, zagen wie ook dat der gewoonweg veul vroag noar was.”
Toun je de Grunneger tekst schreven, ston t al vast dat Michael dij zingen ging? “Nee, wie dachten dat wie as Wat Aans! t zulf wel konden doun. Wie harren al wat moakt en kloarliggen, mor toun insiders t te heuren kregen, toun heurden wie al dat dat nait de beste keuze was. t Idee was schier, moar de uutvoeren klonk belabberd. Den mot je ook eerlek wezen en kieken hou t aans kin. Zo as bie al onze nummers holden wie wel van n uutdoaging of willen wie wat nijs probaaiern, wat gainaine verwacht. Doarom hebben wie via via contact kregen mit Michael en hai was direct enthousiast. De volgende dag zong hai t in en twij doagen loater ontplofte zien telefoon deur alle berichten. Hai was de verrazzing, moar veur hom en veur ons was t ook n verrazzing dat t zo aansluig bie de mensen.”
He’je zulf ook n faveriet onder aal dij aandere verzies? En woarom dij?
“Wie vinden almoal t origineel t schierst. ‘Parijs’ is noeit overtroffen, al zitten der n poar mooie parodieën tussen.”
Was dit veur Michael d’eerste moal dat e in t Grunnegers zong? En smoakt dat noar meer?
“Veur Michael was t de eerste moal inderdoad. Michael het wel al in t Nederlands en in t Engels zongen, moar hai het nou de smoak te pakken. Michael is aansloten bie Wat Aans! en er is al nije meziek moakt woar wie mit ons drijen te heuren binnen. De kombinoatsie en soamenwaarken is wel even wennen, moar t rezeltoat is wel weer wat aans, da’s wel woar wie altied noar zuiken. Wie binnen dus heul aarg bliede mit dizze nije soamenstellen.”
Van n laid van Ed Sheeran hebben joe ‘Mien poedie’ moakt, mit de bekendste regels uut Erwin de Vries zien ‘Maffiosa’. Wat von Erwin doarvan? “Wat Erwin der van von, waiten wie nait echt. Ik leuf dat e t wel schier vond en hai har bie Noord zegt dat e de royalty’s wel binnen zugt kommen as t n grote hit zal worden. Nou da’s noeit t geval west en dat was ook wat gekscherend noatuurlek. t Was gewoon leuk om te moaken en t was n spontoan idee.”
Mot dat voaker doan worden, Grunneger teksten schrieven op hits uut de landelke Top 40? “Dat is wat al veul voaker is veurkomen. Wia Buze dut t ook, Olaf Vos het t ook doan en wie hebben der ook wel n handje van om t te doun. Nog voaker zal mooi wezen, moar dat mot elkenaine zulf waiten. Ik denk dat de uutdoagen der in zit om mit n Grunneger tekst in de Top 40 te kommen en nait zozeer om n Top 40-hit in t Grunnegs te moaken.”
Joen pebliek zel jonger wezen as bie aandere Grunneger artiesten. Is t jonkvolk nog n beetje in veur de streektoal?
“Loat mie ten eerste zeggen dat t nait allenneg jonkvolk is wat noar ons luustert. Van begun òf aan hebben wie altied inzet op de jeugd, moar t bliekt telkens weer dat ook oldern zich vernuvern mit onze meziek. Dat komt denk ik, omdat ze t herkennen, de toal. Doarnoast is t zo dat t jonkvolk juust holdt van de genres woarin wie meziek moaken. Of t nou hiphop of house is, wie moaken gewoon popmeziek. Meziek dij populair is bie de jeugd en wie hopen den ook telkens weer dat de meziek ze aanspreekt. Veural noa ‘Proat toch Grunnegs mit mie’ waiten wie dat de toal ook nog leeft onder de jeugd en hebben wie veul jonkvolk t heuren mitzingen.”
d’Leste poar joar binnen verschaaiden artiesten en bands in t Grunnegers zingen goan. Hou zel t kommen dat der zo’n opgang is? “Wie waiten t nait. Ik denk dat t veur elke muzekant n aander ofweging is woarom ze juust de
Grunneger toal gebruuken veur heur meziek.”
Woarom binnen joezulf mit t Grunnegers aan dloop goan?
“Nou t is zo dat Teun en Rik elkoar tegen t lief binnen lopen in Leeuwarden, woar ze allebaaide meziek studeerden. t Eerste joar konden ze t al goud vinden en gingen ze ook soamen rappen, moar bie t leste project van dat joar gingen ze soamenwaarken. Der was ain verschil tussen baaiden, Teun rapte toun Engels en Rik in t Nederlands. Wat baaide wel gemain harren dat was zulfspot, humor en aigenlieks waren t gewoon twij provincioale knuppels uut Grunn. Rik mit zien aarg aanwezege accent en Teun woonde toun nog in t Zaandt, totoal nait stads. Grunnegs proaten deden ze baaide al en om zichzulf beter as provincioale knuppels uut Grunnen te profileern gingen ze ook mit t Grunnegs aan loop. t Was om te probaaiern, moar t was vanòf ‘Haalf Stront, Haalf Regenwotter’ al dudelek dat dit was hou Wat Aans! mot wezen, hou t mos klinken en dat dit is wat bie de baaide jonges paast.”
Is Grunnegers n goie toal om in te rappen? “Nou is t zo dat t in elke toal wel kin, moar veur ons is t juust goud om in t Grunnegs te rappen. De toal is en klinkt wat roeger en omdat der waaineg andern rappen in t Grunnegs, motten wie zulf alles ontdekken en probaaiern. Dit het betrekking op themoa’s, moar ook kwa toal. Nait allenneg wat betreft rapmuziek, moar dat is de ontwikkeling bie alle Grunneger meziek. Der komt steeds meer popmeziek in t Grunnegs en der wordt steeds minder binnen koaders docht.”
‘Proat toch Grunnegs mit mie’ is n zingboar laidje, is t schrieven van zukse teksten aans as van rapteksten?
“Ja, heul aans. t Is zo dat aal onze rapteksten al verschillen wat betreft t schrieven. Elk laidje vroagt om zien aigen tempo, riemschemoa’s en inhold. Rap of zang, moakt niks uut. Wel is t zo dat je wat meer op de melodie motten schrieven mit n zingboar laidje en dat nait alles huft te riemen. t Mot gewoon soepel lopen en t laifst ook makkelk mit te zingen veur pebliek.”
Wel binnen joen meziekoale helden of grode veurbeelden? En hebben dij ook invlouden op joen meziek?
“Veur Rik en Teun is t veurnoamelk de hiphop en rap, althans dat was altied zo. Rik luustert tegenwoordeg ook veul popmeziek en Teun luustert ook van alles en nog wat, t is in de loop der joaren wel wat braider worden. Tegliekertied stoan we den ook wel weer te springen wanneer Dr. Dre n nije ploat uutbrengt, want dat is wel de meziek dij ons vrouger aanspoorde tot rappen en woardeur wie nou zo binnen as wie binnen. Michael is echt n Justin Timberlake-fan. Michael is den wel bekend vanwege zien zangkunsten, moar kin ook wel nuver rappen. Wie kommen der mit zien drijen dus altied wel uut as der muziek luusterd wordt of moakt mot worden.”
En wel vin je goud in de Grunneger meziek?
“Rik is degene dij de muziek in t Grunnegs wel t mainste volgt, moar hai volgt ook echt sikkom alles wat betreft de Grunneger toal en meziek. Zien favoriete Grunneger meziek is van Erwin de Vries, moar ook Ede Staal, Jan Henk de Groot en Edwin Jongedijk vindt e goud. Wel binnen wie t der allemoal over ains dat sommegen echt podiumbeesten binnen en op dat vlak echt uutblinken, n kunst op zich. Doarom hebben wie ook n zwak veur Burdy. Overal woar wie kommen en woar hai ook is, doar zet e de boudel op de kop en t is gewoon altied n feest.”
Grunneger artiesten zingen in verschaaiden meziekstielen. Joe richten joe ook op n braid genre. Is der nog n stiel woar neudeg wat mit doan worden mot?
“Wie richten ons ook echt op popmeziek, moar den echt alle popmeziek. Wie binnen begonnen mit hiphop, moar doarnoa mit ‘Woisjawel’ direct noar house overstapt en veranderden zo sikkom elk nij nummer van stiel. As wie vinden dat der weer es n bepoalde stiel in t Grunnegs moakt mot worden, den denk ik dat wie er geliek mit aan de slag goan. t Belangriekste is dat er deur veul meer artiesten nou popmeziek wordt moakt in meerdere populaire genres, dat moakt t veur alle mensen wat tougankelker.”
Wat binnen joen plannen veur t aankommende joar? Is der nog wat noast de soamenwaarken mit Michael, of bin je nou echt n trio? “Wie binnen nou echt n trio, wel wait kommen der nog meer soamenwaarkens. Der staait nog niks vast. Dat wie nou n trio binnen, zörgt der wel veur dat je verschillende kombinoatsies kinnen verwachten. Meziek van ons drijen, meziek van Teun en Rik, meziek van Michael en Teun, alles kin nou. t Nijste nummer dij uut gaait kommen is aine van ons drijen. Michael heurde bie Jeroen Russchen (producer en artiest, red.) n poar Wat Aans! nummers dij al joaren op de plaanke lagen en hai aaiste om doar wat van uut te brengen, moar den mit hom derbie in t nummer. Doar is dus de eerste van herschreven en midden dezember mot de eerste clip van ons drijen uutkommen. t Nummer hait ‘Doe bist ‘r nog nait’, meer kinnen wie er nog nait over kwiet.”
Rik, Teun en Michael, daank veur dizze Droadproat. t Leste woord is aan joe.
“Bert, heul aarg bedankt veur t interview, wie vonden t n eer om dit interview te doun.”
‘Aans Wat!’ Wat Aans!
Vergees te downloaden van de webstee: http://www.wataans.nl/
Nijer waark van Wat Aans! is te zain en te heuren op YouTube:
https://www.youtube.com/user/WatAans
Wat Aans! op Facebook:
https://www.facebook.com/wataans
FiezeRik op Twitter:
https://www.twitter.com/fiezerik
De Beunhoas op Twitter:
https://www.twitter.com/debeunhaas
FiezeRik op Instagram:
https://www.instagram.com/fiezerik
Michael Hoppentocht op Instagram: https://www.instagram.com/miichaaaell
