Droadproatn: Facebook-interview mit Sproakwotter
t Oldambster duo Sproakwotter moakt nijmoodse Grunneger laidjes. De manlu hebben heur aigen stiel binnen de Grunneger meziek, dij je akoestische hiphop nuimen kinnen: Harry van Boven (Finnerwold, 1970) rapt zien teksten onder begelaaiden van Martin Blok (Winschoot, 1971) zien gitoarspul. n Poar apaart, kinst wel zeggen, doar wil Kreuze wel es wat meer van waiten. In dizze Droadproat is t woord aan Sproakwotter.
![](https://dideldom.nu/wp-content/uploads/2023/09/afbeelding-2.png)
Foto: Marcel Lameijer
Harry en Martin, t eerste da’k van joe heurde was ‘Ladderzat’, k heb dat toun akoestische hiphop nuimd. Is dat n goie omschrieven?
“Wie begriepen dat men t akoestische hiphop nuimt. Omdat der in rapt wordt, legt men al gaauw dizze link. Harry is van vrouger heer n hiphoppertje oet de Grunneger breakdance tied in de ’80-joaren. Vandoar dat hom t rappen zo makkelek òf gaait en Martin speult al vanòf zien 14e gitoar, dus t lag veur de haand dat Sproakwotter rap zol worden onder beglaaiden van n akoestische gitoar. Mor inmiddels is Sproakwotter al veul meer worden as allain dat, Martin is n meziekant in hart en nieren, speult ook bas, keyboard en drum. Dus de nummers dij we op dit mement moaken, binnen verre van akoestisch.”
Zit t ‘nijmoodse’ van joen laidjes in de kombinoatsie van de rap en de meziek? Of zit dat bv. ook in de teksten of d’onderwaarpen? “Tiedens ons eerste optredens haren wie al gaauw deur dat wie binnen de Grunneger meziek wat biezunders deden. Overal woar we mit mensen in gesprek kwamen, haar men t der over dat ze t grappeg vonden en dat ze ook wat meer van dizze tied vonden as van veul andere streektoalartiesten. Omdat akoestische gitoar mit rap en zang wat moderner overkwam, hebben we t al gaauw Nijmoodse Grunneger Laidjes
nuimd. De onderwaarpen bin oet ons leven grepen, de dingen dij wie mitmokken, wat der om ons hèn gebeurd en veural de dingen dij ons roaken. As wie mit n laidje kommen, komt t ook echt oet ons haarte. Dat komt netuurlek ook omdat we ze zulf schrieven en componeren.”
Waren je veur Sproakwotter al mit meziek aan d’loop?
“Veur Martin begon t zo rond 1987 dat hai veur t eerst in de bandjes Yellow en Marathon speulde. Wat loater tussen 1990 en 2001 oetgruide tot de band De Nacht, mit as hoogtepunt in t veurpregramma van De Kast van Syb van der Ploeg. Noa De Nacht is hai mit drij man deurgoan mit n nije zangeres as de band Tegenlicht. Tot aan vandoag aan dag speult hai din ook nog in dizze band. Tussen 2008 en 2014 speulde hai ook nog in de coverband Sodom Satellites. In 2013 is e mit Harry veur t eerst as Sproakwotter goan optreden bie toneelverainen Vita Nova in Winschoot. Harry is rond 1985 fanatiek begonnen mit breakdancen, zo tussen 1986 en 1990 kwam doar ook t rappen bie. Dus zo’n 22 joar loater begunt hai per touval mit Martin te rappen in Sproakwotter.”
Op t heden binnen verschaaiden artiesten en bands mit de Grunneger toal aan d’loop. Hou zel t kommen dat der zo’n opgang is? “Grappeg dast dat vroagst, wie hebben t der net oetgebraaid over had. De tröts op Gunnen speult hier volgens ons n grote rol in. t Beschaaiden kerakter van de Grunneger is zo langzoamerhaand aan t veraandern, wie duurven de leste tied liekt meer veur onszulf opkommen. De oardbevens in ons pervinzie hebben hier netuurlek ook aan biedroagen. Zowat t ainegste goie wat we doar aan overholden hebben. Ons Grunneger toal is netuurlek ook n geweldege toal om laidjes in schrieven, wat is der schierder dan in joen aigen toal joe te oeten? t Liekt der warempel op dat de leste tied veul meziekanten de Grunneger toal herondekt hebben. Wat volgens ons n geweldege zoak is ….”
Is Grunnegers n goie toal om in te rappen?
“Over dizze vroage kinnen we hail kört wezen. Grunnegs is veur ons gain stoere toal om in te rappen of te zingen. We proaten en denken in t Grunnegs. Grunnegs is onze toal. Van kinds òf aan proat wie al Grunnegs ….”
![](https://dideldom.nu/wp-content/uploads/2023/09/afbeelding-3.png)
Foto: Bert de Boer
Veur veul Grunnegsproaters is t schrieven en lezen den al weer n stuk stoerder. Hou is dat veur joe?
“Dat klopt, omdat we t nait wend binnen in t Grunnegs te lezen en te schrieven, vaalt dat veural in t begun nait mit. Martin het mit lezen din ook hailemoal gain muite meer, mor t schrieven vindt hai nog aal stoer. In dij 2 joar dat Harry nou zo bezeg is mit riemkes moaken, gaait hom t schrieven aal makkeleker of. Mor n ofgestudeerde Grunnegerloog is hai din ook nait. Dus as der n poar schrieffouten in t interview zitten, magst ze gerust van ons verbetern. Aal doage leren we nog nije dingen bie.”
Noast t schrieven van teksten, hou gaait bie joe t moaken van laidjes in zien waark? Dou je t aal mit joe baaident, of het elk doar zien aigen aandail in?
“Wie binnen aalbaaide haile gedreven kereltjes, as wie ons aargens in vastbieten, loaten we nait weer lös. Martin het altied wel n nij riedeltje en Harry het altied wel weer n nij themoa of n nij riemke kloar liggen. Denk dat we op dit moment z’n 51 ideeën op papier hebben stoan. De mainste kommenekoatsie gaait bie ons via Whatsapp. As Martin din es weer n nij stukje meziek het bedocht, speult hai dat gou even in op zien mobieltje en stuurt even n Appje. En aansom gaait dat mit ideeën en teksten net zo. Mainsttied kommen we even ainmoal in de weke bie mekoar om te repeteren of nije laidjes oet te waarken. Din hebben we baaide al n idee woar t laidje hén mot. Omdat Martin veur t meziekoale gedailte zörgt, het hai din ook al n meziekoale indailen van t nummer moakt. Harry het altied veul teveul tekst, wat op zuch wel makkelek is. Want op dat moment wat wegstrepen is altied makkeleler dan nog even gaauw der wat bie bedenken. Soms hebben we din ook laidjes dij zowat in ain oavend worden moakt en soms liggen ze al n haalf joar op de plaanke.”
Wel binnen joen meziekoale helden of grode veurbeelden? En hebben dij ook invlouden op joen meziek?
“Wie hebben baaide zo ons aigen meziekoale helden. Martin is as gitoarist van vrouger heer n echte AC/DC en ZZ Top fan, dij meziek het hom ook aanspoord om gitoar te goan speulen. Harry doarentegen huil in zien jonge joaren van RUNDMC en de Beastie Boys en alle hiphopmeziek woar je mor op breakdancen konnen. Dij invlouden binnen meschien wel in ons meziek terogge te heuren mor dat doun wie nooit bewust. Wie perbaaiern wel zo ons aigen sound neer te zetten.”
En wel vin je goud in de Grunneger meziek? “Wat de Grunneger meziek betreft kinnen we wederom kört wezen. Der komt op dit moment zoveul gouds oet in onze toal dat we ze nait aalmoal opnuimen kinnen. Wie holden de Grunneger meziek din ook goud in de goaten en heuren veul schiere nije dingen.”
Der wordt inderdoad veul goie Grunneger meziek uut. Is t wachten op n landeleke deurbroak veur n Grunneger artiest?
“Dat zol netuurlek hailemoal geweldeg wezen. As ons dat nou es even overkwam ….”
Joe hebben al wel optredens doan boeten de pervinzie, hou waren doar de reaksies? “Wie waren altied bliede verrast over de reaksies boeten Grunnen. Mit schiere reaksies in Drenthe tiedens de Fiets4daagse. Woar we zowel van Drenthen as van mensen oet o.a. Den Hoag kompelmenten kregen. Ook binnen we altied weer verboasd over Vraisland. Doar wordt t hail aarg woardeerd as je wat in streektoal doun. Altied gezelleg. Ook tot in Gelderland en Overiessel heuren wie allain mor goie berichten. Wie binnen zulfs in de Streektoal Top 48 van dit joar mit ons nummer Snoetjeknovveln op de 3e plekke eindegd. Wat veur ons netuurlek geweldeg is.”
Wat kinve d’aankommende tied nog aal verwachten van Sproakwotter?
“Mooi das t dat even vroagst. Wie hebben net t videoklipke veur onze nije spaigelploat ‘Sukerbaiten Kloas’ opnomen. t Laidje wordt op zotterdag 12 sept. lanceerd in t radio Noord pregramma Café Martini. t Klipje is i.s.m. K&D transport oet Beerte tot stand kommen. Din goan we vot deur mit de opnoames veur t volgende laidje, dij t einde van dit joar oetkomt. In jannewoarie en feberwoarie goan we aan d’loop in de studio, wie hebben zoveul laidjes liggen, om ons eerste album kloar te moaken. Wie verwachten dizze in t veujoar van 2016 oet te brengen ….
Wie hebben t der mor drok mit.”
Harry van Boven en Martin Blok, daank veur dizze Droadproat. t Leste woord is aan joe. “t Allereerste willen we die bedanken veur de aandacht dijst ons geven hest in dizze Droadproat. Woardeur wie weer aan n iets braider pebliek veursteld binnen N petje òf N Wie hopen baaide dat veul mìnsen dit interview lezen en dat ze aalmoal net zo enthousiast as ons worden over onze ‘Nijmoodse Grunneger Laidjes’ en dat we der n bulde fans bie kriegen. As joe aalmoal n beetje nijsgiereg binnen worden, kin je ons netuurlek gewoon volgen deur ons even n doemke omhoog te geven op Sproakwotter-Facebook. En kiek op ons Sproakwotter Youtube-knoal woar we geregeld nije klipkes opzetten. Meschien zain we mekoar wel n keer bie n live op treden, want dat vinden we netuurlek t allermooiste. Groutnis oet de schierste plek van Stad en Ommelaand, van Sproakwotter oet t mooie Oldambt. Harry en Martin.”
—————————————————————-
Op t mement is meziek van Sproakwotter nait op spaigelploat verkriegboar. Veur de laifhebber is wel (wat nijmoodser) n USB-stick te koop mit ale nije nummers en teksten.
![](https://dideldom.nu/wp-content/uploads/2023/09/afbeelding-4.png)
Sproakwotter
8 gb USB-stick
€ 9,95
Te koop bie Venema’s Textiel, Finnerwold
of
Te bestellen bie Sproakwotter op Facebook: https://www.facebook.com/pages/
SPROAKWOTTER/177714379062329
Sproakwotter op Soundcloud:
https://www.soundcloud.com/sproakwotter
Sproakwotter op YouTube: https://www.youtube.com/channel/
UCSnePfHnTd1UEuw75VH6Nww
Sproakwotter is ook te beluustern op Spotify.