Droadproatn – Facebook-interview mit Krödde

t Duo Krödde was in 2013 n verrazzen in de Grunneger meziek. Rients Faber (Stad, 1974) en Bart Corporaal (Franeker, 1976) brochten in jannewoarie van dat joar heur eerste laid ‘Duuster’ uut op YouTube. t Wuir vot oppikt deur lokoale en regionoale radiozenders. Dizze gaauwachtege deurbroak gaf aanzet tot t opnemen van n hail album. n Plougje meziekanten wuir bie nander gadderd en nog veur t ènde van t joar kwam ‘Waterlijn’ uut. Op oljoarsdag bleek dat ‘Duuster’ in Alle 50 Goud op nummer 30 binnenkommen is. Nou is der n nije single, ‘Zunneschien’. Tied veur n proatje mit de manlu van Krödde.

Bert Wijnholds

Rients en Bart, k schreef net dat je vleden joar de verrazzen in de Grunneger meziek waren. Vuilt dat veur joe ook zo?
“Wie binnen zeker verrast deur t succes! Dou we begonnen, haar we nooit docht dat ons meziek draaid worden zel op Radio Noord en mit n noteren in de Noord 9 kommen zel. Wie hebben juust dou we begonnen zegd tegen nkander: ‘Wie goan nou ais meziek moaken zunder concessies en t moakt nait oet wat aander lu der van vinden. Wie goan veur de meziek dij wie zulf moaken willen’. Geweldeg dat t din oppikt wordt!”

Haar je al plannen veur n hail album toun t laid ‘Duuster’ uutkwam?
“Ondanks dat we in n körte tied veul nummers schreven hebben, woaronder ‘Duuster’, haren we nait direct t plan om n haile CD te moaken. ‘Duuster’ sprong der as nummer bovenoet en we besloten dat nummer via de social media oet te brengen. De clip hebben we doudestieds in n uurtje schoten. Dou ‘Duuster’ aal voaker draaid wer en beluusterd op YouTube, kregen we van volgers op FaceBook de vroag of der n haile CD kommen kon. In tied was ons repertoire flink gruid en hebben we n selectie gemaakt van 11 nummers en de CD ‘Waterlijn’ in aigen beheer opnomen en oetbrocht.”

Was ‘Waterlijn’ ook votdoadlek zo’n sukses?
“Tja, wat is succes. De CD is goud ontvongen. n Enkeling von hom wat zwoar, mor wieder was elkenain enthousiast. ‘n echte luusterploat’, kregen we voak weerom. En dat is t ook. t Is gain feestmeziek, mor nummers woarst goud noar luustern moust. Op de Radio binnen benoam de Grunnegstoalege nummers draaid deur de noordelke regionoale omroupen. Maar t nummer ‘Duuster’ is toch met kop en scholders t maist bekìnde nummer van de ploat. Van de ploat hebben we ook de titelsong ‘Waterlijn’ oetbrocht. t Grappege is dat we juust van dat nummer dochten dat t meer draaid worden zel op de radio, omreden dat t makkelk in t geheur ligt. Nait dus! Meschain wel omreden dat t n Nederlandstoaleg nummer is? Zo zai je mor weer dat der gain paail op te trekken vaalt en dat moakt t aalmoal zo leuk.”

Joe nuimen joezulf Krödde, hou bin je op dij noam kommen?
“Hail ainvoudig. Wie wonen baaident in t dörp Ten Post. Aan d’aander kaant van de N360 ligt t buurtschop Kröddeburen. Bart zien keuken kiekt oet op t kombord mit dij noam, dus dou we tiedens n biertje op zuik waren noar n noam, keken
we noar buiten en wer t Krödde.”

t Plantje mit de noam ‘krödde’ wordt voak zain as onkruud …
“Klopt. Krödde betaikent onkruud.”

Hou kinve joen meziek omschrieven, wat is typerend veur Krödde?
“n Recensent beschreef ons meziek as poëziepop. Dat vonden wie wel trevvend vonden. De teksten binnen veur ons belangrek. Wieder speult in de muziek de piano n dominante rol. Voak het de gitaar dij rol, mor de melodische piano is toch n beetje ons handelsmaark. Ook nou we oetgruid binnen tot n volledege band, holden we vast aan n laaidende piano. t Effect hiervan is dat ons gitarist Jorgen zuk haldaal oetleven kin mit loopjes en zo n vrije rol het. Ons meziek is wieder gain feestmeziek. t binnen veuraal rustege luisterlaidjes.”

Joe moaken laidjes in t Nederlands en in t Grunnegers, het dat n bewuste keuze west? “Zo as zegd, hebben wie bie de start van Krödde tegen nkander zegd: we moaken de meziek die we willen. t Gevolg hiervan is dat we d’aine keer n Grunnegs nummer schrieven en din weer n Nederlands nummer. Sommege lu vonden dat wie n keuze moaken mozzen, mor doar hebben we dus bewust nait veur kozen. Wie moaken de meziek dij we groag moaken willen.”

Joe binnen baaident nait opgruid mit de Grunneger toal?
“Dat klopt. Bart is van oorsprong n Vrais. Rients is wel opgruid in Grunnen. Rients is den ook degene van ons baaident dij de Grunneger teksten schrieft of teksten van Bart vertoalt in t Grunnegs, zo as bie ‘Zunneschien’.”

Is t schrieven in t Grunnegers den ook stoer? “Rients is n omgeven opgruid woar Grunnegs proat wer, dus hai is vertraauwd mit t klankbeeld van de toal, mor actief proaten dut hai t nait. Toch kaizen we ook t Grunnegs as toal veur ons meziek. t Geft n extra mystiek aan ons sferische meziek. Lu mainen voak dat Grunnegs n raauwe toal is. Wie hebben ontdekt dat de toal veul ronder en sferisch is as docht. Moar t zingen in t Grunnegs is dus wel n oetdoagen, omreden dat
wie de toal nait van origine beheersen.”

Zingen in de Grunneger toal liekt n oardege opgang te hebben onder artiesten dij der nait mit groot worden binnen. Hou zel dat kommen? “t Liekt inderdoad n trend te wezen. Henk Scholte van RTV Noord sprak lest al van n Grunnegse lente. Wie waren der ons in elks geval nait van bewust dou wie de keuze moakten om ook in t Gronings te goan zingen. Meschain is der nou meer roemte veur niet-Grunnegers om in t Grunnegs te zingen. t Wordt deur t pebliek meer aksepteerd en deur ale nije digitoale platförms is de drumpel hail leeg worden veur meziekanten om de meziek te moaken en te prezenteren aan n braid pebliek. Doar plukken we nou de vruchten van.”

Woarin vinden joe inspiroatsie veur t schrieven van teksten?
Dat verschilt per nummer, moar wie hoalen de mainste inspiroatsie oet ons directe leefomgeving, dingen dij wie zulf mitmoaken of zain.

Wel binnen joen meziekoale helden of grode veurbeelden? En heurve doar wat van weer in Krödde?
“Wie hebben n braide smoak. Rients is fan van Bruce Springsteen, Bart holdt van Ramses Shaffy tot Radiohead. Moar jazz, klassiek en metal draait hai ook. De rest van de band holdt van Queen tot Jimmy Hendrix. Heurst dit brede palet nait 1 op 1 weerom in ons meziek. De rode droad is wel dat we van meziek holden mit n mooie melodie en teksten mit wat daipgang.”

En wel vind je goud in de Grunneger meziek? “Rients gaait veur Edwin Jongedijk. Bart veur Törf en de serieuze nummers van Erwin de Vries. t Is gain Grunnegs, moar Daniël Lohues is qua streektoal wel de absolute bom. Dat is meziekoal aarg genioal aalmoal.”

Joen single ‘Zunneschien’ staait nou hoog in de Noord 9, wordt t de Grunneger zummerhit van dit joar?
“Dat hebben wie nait veur t zeggen, mor dat zel noatuurlek fantastisch wezen. Wie binnen in elks geval ontzettend blied dat t nummer zo goud ontvongen is.”

Kinve veur dit joar nog meer verwachten van Krödde?
“We hebben aarg veul matrioal liggen. We willen rond de joarwizzeln n EP oetbrengen, mit doarop 3 à 4 nummers. n Haile CD zellen we wel willen, mor kost zoveul tied, dat we eerst kaizen veur n EP.”

Rients Faber en Bart Corporaal, daank veur dizze Droadproat. t Leste woord is aan joe. “Meziek moaken is geweldeg. Krödde is gewoon t leukste meziekoale project dat we ooit had hebben.”

=====================================

‘Waterlijn’

Krödde
€ 12,00
Te koop bie http://www.kroddemuziek.nl/

Krödde op Facebook:
https://www.facebook.com/krodde.krodde

Krödde op Twitter:
https://www.twitter.com/KroddeCom

Krödde op Soundcloud:
https://www.soundcloud.com/kr-dde-muziek
Krödde op YouTube:
http://www.youtube.com/user/KroddeCom