Droadproatn: Facebook-interview mit Ingeborg Nienhuis

Grunnen het n nije streektoalfunksjenoares. De Pervinzie en de RUG hebben Ingeborg Nienhuis
(Zoltkamp, 1981) aansteld as opvolgster van Eline Brontsema. Sunt 1 april is Ingeborg aan d`loop in heur nije affeer. In t eerste nijsbericht luit z’al waiten dat t veur d’haand ligt om zoveul meugelk digitoale middeln in te zetten bie t deurgeven van de Grunneger toal. As digitoal tiedschrift is Kreuze doar vanzulf slim bliede mit. In dizze Droadproat geven wie geern t woord aan Ingeborg Nienhuis.

Ingeborg, op t mement da’k dizze vroag stel, bist nog mor n moand in funksie. Bist der mit veul zin aan begund?
“Bert, bedankt veur dien belangstellen. Ik kin die verzekern da’k vot al haile veul zin haar ien dizze affeer. Ik kom oet n boan woar ik hail best op streek waas, mit laive lu om mie tou. Kins wel noagoan dat ain zukswat nait morzo achterlet. Wat dat aangaait begun ik op roakeldais. Gelukkeg was t ontvangst ien t Grunneger wereldje gelieke waarm as t òfschaaid van t onderwies. Mien kollegoa Susanne Mars het doar bieveurbeeld haile slim aan biedroagen. Ik bin vol lof over behulpsoamhaid van verschaaiden mìnsen dij der kiek op hebben en van al dij slachtovvers dij ik al veur de borst sprongen bin veur lutje onderzuikjes.”

Hest veul reaksies kregen op dien benuimen? “Joa. Reaksies waren benoam posetief. Nait elk en ain haar votdoadelk deur da’k stoppen zol ien t onderwies en dat waas eefkes sloeken veur mien bevrunde kollegoa’s, veul leerlingen en veur miezulf ook wel, mor ik heb veul hartelke woorden had en zulfs kedo’s kregen.”

Woarom bistoe de goie persoon veur dizze funksie?
“Dat kin n aander beter veur mie beoordelen, t mout immers nog mor blieken of kemizzie n goie keuze moakt het. Ien elks geval heb ik kennis van toal deur studie en waark, heb ik t Grunnegers al es onderzocht en bin ik wies mit mien moudertoal, dij mien ollu mie leerd hebben: ons Grunneger Toal.”

Ligt der veul waark op die te wachten? “Joa, der is genog te doun. Der is nog materioal van t Vroag & Antwoord-onderzuik dat veur n groot deel verwaarkt worden kin. Doarnoast is t aanlokkelk om sociolinguïstisch onderzuik mit te nemen noar t Grunnegers en heur sprekers, is t plan om wat meer digitoal te goan, binnen der n poar schoulen dij aangeven hebben dat zai geern n lespakket toalkunde & Grunnegers willen, kin we noadenken over biedroagen ien bestoande medioa zoas Toal & Taiken, t Dagblad, RTV Noord en Webloug, is t goud om soamen te waarken mit lu van Hoes van de Grunneger Cultuur, t Alfasteunpunt, waitenschopswinkel, de studie Minorities & Multilangualism, ons Drentse kollegoa`s, De Verhalen van Groningen en nog n haile bult en zo binnen der nog n poar dingen dij aandacht verdainen.”

Hou staait t der op t heden veur mit de Grunneger toal?
“Net als aal aander toalen kent t Grunnegers heur kaanzen en bedraaigens. As je zain houveul toneelverainens der wel nait binnen ien ons pervinzie dij Grunneger stukken opvoeren din krieg je n rooskleureg beeld. Veul Grunneger artiesten hebben n volle agenda, dat liekt ook goud. Mor aan aander kaant binnen der veul ollu dij der veur kaizen heur kiender t Grunnegers nait bie te brengen en binnen der zulfs lu dij heur schoamen veur dat deel van heurzulf dat ien heur sproak verweven zit. Dat begroot mie.”

Woarom is t belangriek om de Grunneger toal vast te leggen en deur te geven? “Dij vroag kin je joe stellen over wat toal din ook, want is dat belangriek? Ik leuf t aal, want zo laank as mìnsen bestoan, holden zai heur bezeg mit de vroagen wel zai binnen, woar zai votkomen en woar zai noartou goan. Mit (Grunneger) toal is dat nait aans. Registreren budt holvast. Lös doarvan vien ik t persoonlek haile weerdevol om bieveurbeeld op webstee van t Meertensinstituut proatjes te heuren van mìnsen oet hail ons pervinzie (der stoan zulfs tekstfragmenten op oet t haile laand) van veule joaren heer. Schitterend om te heuren hou t dou sproken wer! En t deurgeven van toal? Toal is n mìnselk instinct, woarmit wie ons onderschaaiden van aander soorten. Ons haile cognetieve systeem is derveur moakt en zunder sproken toal of n aander soort zo as geboarentoal of technologiese hulp kinnen wie nkander nait begriepen. Zulfs mít onderlinge toaleghaid is der al zoveul onbegrip ien wereld, dus loat ons dit stukje
toch mor mooi n beetje baineg holden.”

Veur t vastleggen en deurgeven wilst ook veul digitoale middeln inzetten. Wordt doar nou nait genog mit doan?
“As ik om mie tou kiek din zai ik hou slim of ons wereld ien körte tied digitoaler worden is. Mìnsen blieken der oardeghaid aan te hebben om t Grunnegers te heuren via social media, as joe bieveurbeeld kieken noar t succes van Eric Bats zien ‘Grunn tv’. t BGTC het al n nuver webstee, t Hoes van de Grunneger Cultuur het n haile beste, der wordt twitterd, zulf pebaaier ik wat mit t Greunenkriek op Facebook… Mor nait elk en ain het zien slinger aan tekst dij opschreven is, dus wellicht kinnen wie ien verslagleggen van ons onderzuik ien t vervolg ook wat mit aander middeln.”

Doe hest in t onderwies waarkt, zugst doar ook meugelkheden om wat mit de streektoal te doun? “Zeker. Zulf he’k verschaaiden leerlingen begelaaid bie heur profielwaarkstuk over t Grunnegers, k heb noar aanlaaiden doarvan al n gesprek mit lu van t Alfasteunpunt had. n Lesmethode veur n masterclass Grunnegers of aander module over toalen ien Nederland zol ook goud wezen.”

Leeft t Grunnegers nog aal bie jongere generoatsies?
“t Leeft, mor aans as ien mien jeugd en aans as ien jeugd van mien ollu. Zoas ik al nuimde heb ik verschaaiden kiender trovven dij heur profielwaarkstuk over t Grunnegers doun wollen. Mien masterclass Grunnegers zat aan hazzens tou vol en kiender magen geern proaten over heur ervoaren van ons toal. Veurleescup van Stichten Kostverloren is ook zukswat moois: kiender van grondschoulen tussen 8 en 12 kinnen ien n schitterend theoater n stuk veurdroagen ien ons toal en der nog n pries mit winnen ook! Schoulmeesters en -juvven dij ik over telefoon sprak om n idee te kriegen van hou t leeft en wat der doan wordt, zeden apmoal dat bewegen pas komt mit n goie aanpeerdjeder binnen n schoul: n leerkracht, veurleesmoeke of IB’er. Dat is t haile aaiereten: dat riedeltje over dat zoaien en dat oogsten.”

Al joaren wordt pebaaierd om n hogere stoates veur t Nedersaksisch te kriegen. Is t neudeg dat dij der komt?
“Kört zegd betaikent dij begeerde, hogere stoates n aander politiek-economiese erkennen. t Is vanzulfsprekender om n toal te implementeern ien t onderwiescurriculum van PO, VO en hoger onderwies en zo wordt dat beter beschaarmd. Binnenkört proaten lu ien t Europarlement van Bruzzel over t Nedersaksisch – dat: wel wait.”

Wat betaikent dat concreet? Mot t Nedersaksisch den net zo behandeld worden as t Vrais? “Doar heb ik mie nog nait genog mit bezeg holden. Der is n gliedende schoal van hoast niks ien ons toal tot alles ien ons toal. Elk zetje dat wie opschoeven ien richten van ‘meer ien t Nedersaksisch’ zol mooi wezen. Zo’n erkennen droagt doar aan bie. Mor wonderen kin je nait verwachten.”

De pervinzie wil meer soamenwaarken tussen t BGTC en t HvdGc. Wat is doarvan t doul?
“Wat Siemon Reker apmoal doan het veur ons Grunneger Toal is onbetoalboar en zo zitten der ook n poar titoanen bie dat Hoes: n schat aan ervoaren en kennis. Patricia Ottay, Jan Glas, Eddy de Jonge en Henk Scholte binnen ons kollegoa`s doar. t Zol zunde wezen om de kwaliteiten van dij twij instaanzies nait aan mekoar te koppeln. t Doul is dus meer aindracht en rendement. Mien boas, Goffe Jensma, vien ik haile staark ien t verbienden van verschaaiden mìnsen mit heur talenten. Ik bin der dus wel mit veur dat wie dit zo doun.

Vanuut dij soamenwaarken mot veur vief joar n agenda opsteld worden veur Grunneger toal en cultuur. Wat binnen doarop de speerpunten? “Wie mouten komende tied aankieken hou waarkboar en hoalboar t apmoal ien praktiek bliekt te wezen, mor vaste punten op agenda van ons kemizzie binnen zoaken as onderzuik, onderwies en publikoatsies. Onder dij nuimers kinnen
hail wat onderwaarpen schoard worden.”

Der binnen Grunnegers dij mainen dat ons toal gain toukomst het en over datteg joar nait meer bestaait. Ons streektoal is toch duurzoamer? “Hailtied stilstoan bie endeghaid van dingen vien ik persoonlek nait zo neudeg en ook n klaain beetje makoaber. Ien plak van ons dik moaken over hou laank ons toal nog te leven het, kinnen wie beter energie steken ien t deurgeven dervan. Jan Glas het doar n mooi stukje over schreven op Webloug.Of t veul zin het joe òf te vroagen hou of t goan zel is evenzogoud mor de vroag. Britten zeggen: “You never know how the cookie crumbles”. Ien ons Grunnegers klinkt t eefkes minder fris, mit dij oetdrukken over t peerd ien t gat kieken, mor hou of je t ook oetdrukken willen:
tied zel t oetwiezen.”

Ingeborg Nienhuis, daank veur dizze Droadproat. t Leste woord is aan die.
“Haile stief bedankt veur joen belangstellen. As ik nog wat zeggen mag: toal is n dail van joen identiteit en dus haile aigen. Wees loos op joen toal en omaarm joen meertoaleghaid – t is n veurrecht en geft n veursprong om meer as ain toal mit plezaaier te beheerzen. Leer kiender en anderstoalegen t Grunnegers, mor wees nait belerend as dat nait vot haile smui gaait; net as veur aal dingen geldt hier ‘utile dulci’: t nofleke mit t nut verainen. n Webstee as Klunderloa het haile schiere laidjes en verhoaltjes veur kiender. Verschillen tussen t Grunnegers van lu oet verschaaiden wiendstreken of van verschaaiden generoatsies geven kleur en teunen aan hou slim ons toal ien bewegen is – t is nait zo dat allinneg t Grunnegers woarmit ain opgruid is, goud Grunnegers is. Heb feduutsie ien joezulf en loat joe nait onder t mous stoppen deur veuroordail of de onzekerhaid van n aander. Beklokker aal dij lu ien ons pervinzie en doarboeten dij heur best doun veur t Grunnegers deur onderwies, meziek, toneel, schrieverij, onderzuik of wat ook. Ien leste dareg joar is der deur ontzagwekkend veul mìnsen mitwaarkt aan t onderzuik noar Grunneger toal, dat is kant n sieroad. t Zol haile mooi wezen as der ien toukomst ook nog mìnsen binnen dij mitwaarken willen aan onderzuik vanoet ons bero. En din nog ain ding: t deurgeven van toalen hebben joe veur t grootste deel zulf ien haand. Tot zowied eerst mien ‘preek’.”

Ingeborg Nienhuis op Facebook:
https://www.facebook.com/T-Greunenkriek605027326331593/

De webstee van t Bureau Groninger Taal en Cultuur: http://www.rug.nl/research/
groningertaalencultuur/

t BGTC op Facebook:
https://www.facebook.com/rugbgtc

t BGTC op Twitter:
https://www.twitter.com/bgtcrug