Droadproat: Eline Brontsema

n Droadpost-interview

Sunt 6 feberwoarie is Eline Brontsema (t Zaand, 1988) de nije streektoalfunksjenoares veur de pervinzie Grunnen. t Dattegjoareg jubeleum van heur veurganger Siemon Reker was n goie gelegenhaid om de toak aan heur over te droagen. Is zai n goie opvolger? In dizze droadproat n gesprek mit Eline Brontsema.

Eline bruukt Facebook nait veur heur waark en doarmit ook nait veur interviews. Diskeer is t gesprek verlopen mit de droadpost.

Eline, op t mement da’k dizze vroag stel bist nog gain twij moand in funksie. Kin k al aan die vroagen hou t bevaalt?
Zeker, t gaait mie goud noar t zin! k Heb ook veul positieve reacties had, dat is ook mooi om te heuren vanzulf.

Bist nou de belangriekste perzoon wat de Grunneger toal aangaait?
Zo zai ik dat nait. Mìnsen dij Grunnegers proaten binnen veul belangrieker, zunder heur gain onderzuik!

n Joar eerder wast al mitwaarker worden bie t Bureau Groninger Taal en Cultuur, woarom bist doar toun aan t waark goan?
t Leek mie geweldeg om dat wat mie boeit terug te zain ien mien waark. Dat leek mie wat biezunders en zo zai ik dat nog aal: k vuil mie n geluksvogel.

Hest filosofie stedaaierd, dat liekt nait recht te pazen bie n affeer woarin je mit toal aan d’loop binnen.
Dat heur ik voaker. Mor filosofen hebben nait n bepoald affeer woar ze ien terecht komen noa heur studie. Der is veul meugelk. En dus ook streektoalfunctionoares worden. Bepoalde dingen dij ik leerd heb kin ik wel bruken ien mien waark vanzulf.

Kinst doar n veurbeeld van geven? Bievubbeld teksten analyseren: woar gaait t nou aigelk precies over? Wordt ter n drogreden bruukt? En verder vroagen woar n ander stopt mit vroagen stellen.

Bist 25 joar, is t belangriek dat dizze funksie nou invuld wordt deur aine dij jong is? Ik kin mie nait veurstellen dat t n noodzoak is dat “de nije” 25 is, mor t het wel bepoalde veurdailen vanzulf. Je kinnen bievubbeld makkelk socioale medioa ienzetten en verder kin we weer even veuroet vanzulf.

Bistoe zulf ook opgruid mit de Grunneger toal? Wel mit opgruid mor as kiend nait sproken. Mien pa en moe hebben t altied mit nkanner en mit femilie proat mor tegen kiender wer Nederlands proat. Ik heb t bliekboar leerd deur t te heuren.

Wordt de toal nog wel veul bruukt deur Gunnegers van dien generoatsie?
Ik bin zeker nait ainegste dij op dizze menaaier mit t Grunnegers opgruid is. Van mien generoatsie binnen der nog veul meer dij t as kiend nait proat hebben mor dij t wel heurd hebben van pa en moe. Ik heur ook wel ais dat ze t nait duren omdat ze onzeker binnen over heur toal. Toch zol ik zeggen: gewoon doun!

Der is dus ook wat onzekerhaid wat t proaten aangaait, moar t is nait zo dat de toal nait leeft bie jongere Grunnegers?
Tja, dat onderwaarp komt aaltied aan bod as t over t Grunnegers gaait, ik kin waaineg veurspellen over ons toal. Ik zol t positief holden willen, van oetstaarven is gain sproake, van verandern wel.

Doe nuimdest net de socioale medioa, kin dat n belangriek middel wezen om de streektoal leventeg te holden? t Is n nij middel om mit nkanner te proaten. Mor ook om informoatsie te dailen, bievubbeld over t Grunnegers. Bie t BGTC worden bievubbeld wel TIM’s schreven, teksten over opvalende “Taal Ien Media”, mit n link noar t Grunnegers is. As der n nije tekst moakt is, wordt dij direct op Twitter zet.

Der is pebaaierd om meer erkennen veur t Nedersaksisch te kriegen, tot zowied zunder sukses.
Is t neudeg dat dat der wel komt?
Vanzulf is t antwoord joa. Nait allinneg om t Grunnegers zo goud meugelk te beschaarmen, mor ook om t te stimuleren.

Wat wordt der meuglek mit zo’n verhoogde stoatus? Hou kin t Grunnegers doarmit beschaarmd en aanpeerdjed worden?
t Nedersaksisch – woar t Grunnegers onder vaalt – wordt nou onder dail 2 van t Europese Handvest erkend. n Erkennen onder dail 3 zol n hogere status van t Nedersaksisch betaiken. Allinneg al veur t beeld is t belangriek dat ons toal ook echt deur elk as toal zain wordt. Oetstroalen zegt veul en dat is bie toal nait aans.

Mouten wie as streektoalproaters zulf ook meer doun om dat beeld te verbetern? Dat zo’n hogere stoatus nait allenneg ‘op pepier’ bestaait?
Grunnegers proaten is t veurnoamste!

Speult t onderzuik ‘Vroag&Antwoord’ ook n rol in dij beeldvörmen?
Ik wil nait zeggen dat t Grunnegers n slecht imago het. Dat bliekt ook oet aal dij geweldeg enthousiaste reacties dij wie kriegen van ienvullers van Vroag&Antwoord. Wie kriegen sums laange teksten terug as n vroag wat opropt, bievubbeld over vrouger. t Zol hail mooi wezen as Vroag&Antwoord der mit veur zörgt dat mìnsen mit n positieve, belangstellende blik noar heur aigen toal kieken.

Onderzuik doun is ain van dien veurnoamste toaken. Wat dut n streektoalfunksjenoares nog meer?
Belangstellen vergroten, t gebruuk stimuleren, bievubbeld deur der over te vertellen bie n lezen of deur der over te schrieven. Elke week op deengsdag staait ter n stukje van mie over hVroag&Antwoord ien t Dagblad, elke wònsdag om haalf ain vertel ik der over op Radio Noord en ain moal ien vattien doagen komt ter n kwestie oet t onderzuik noar veuren ien n column op ons webstee. Verder is t eerste echte tastboare resultoat van Vroag&Antwoord “Asjeblieft!”, n boukje over Grunneger tussenwaarpsels van ienvullers en oet vrougere bronnen. t Boukje is schreven deur Siemon Reker, mit mitwaarken van mie en is dit joar oetkomen.

Dustoe dien waark aans as Siemon Reker? t Gait mie der nait om t aans te doun as mien veurganger. k Vien t veuraal belangriek dat t Grunnegers onder de aandacht blift. Doar zel ik mie op richten.

Eline Brontsema, daank veur dizze Droadproat. t Leste woord is aan die.
Om t Grunnegers zo goud meugelk ien beeld te kriegen is t echt belangriek dat ter zoveul meugelk mìnsen mitdoun aan Vroag&Antwoord. Oet ale houken en van ale leeftieden. Hou meer ienvullers, hou beder t onderzuik!

De webstee van Vroag&Antwoord: http://www.hetverhaalvanhetgronings.nl/

De webstee van t Bureau Groninger Taal en Cultuur:
http://www.rug.nl/research/
groningertaalencultuur/

t BGTC op Facebook: https://www.facebook.com/ rugbgtc

t BGTC op Twitter:
https://www.twitter.com/bgtcrug