Droadproat: Edwin Jongedijk
n Facebook-interview mit Edwin Jongedijk
Zanger-laidschriever Edwin Jongedijk (Weststellingwaarf, 1976) het moar ain spaigelploade neudeg had om noam te moaken as Grunnegstoalege artiest: ‘As Ik De Kaans Zol Kriegen’ het hom drij top 2-hits in de Noord 19 aanbrocht, woarvan twije zulfs op nummer 1 kommen binnen. In tied dat aan n nij album waarkt wuir, ston e alweer bovenaan. Dat was van d’zummer mit de single ‘Mien Dörp’. Nait min veur n artiest dij t Grunnegers nait as moudertoal het. t Nije album ‘Mörn Is t Weer Licht’ is nou uut. Kreuze mout moar es even aan de proat mit Edwin Jongedijk.
Edwin, van haarten felesiteerd mit dien twijde Grunnegstoalege album. Bist der vervast slim wies mit.
“Dank je wel Bert. Bin der inderdoad slim wies mit! t Was ook al weer twij joar leden dat k mien eerste Grunneger spaigelploat uutbrocht haar. Dizze ploat is wat meer n bandploat worden as de veurege. Wie hebben wat meer repetaaierd zodat sikkom elk dij mitdee zien inbreng haar. En ook de teksten bin soms wat persoonlieker worden.”
Dien album hait ‘Mörn Is t Weer Licht’. Het dij titel n bepoalde betaiknis? Der staait gain nummer op dij zo hait.
“d’Maiste laidjes hebben n melancholieze ondertoon. Zo schrief k mien laidjes ook t laifst; staark op t leven richt. Thema’s as laifde, tegenslag, verdrait, hoop en zukswat kommen veurbie, mor wel in d’waitenschop dat t wel weer beter worden kin. Most der ook nait in hangen blieven. Dizze titel von k goud pazen bie dat gevuil.”
Op dien webstee heb k lezen dat t nije matrioal verrazzend, moar vertraauwd is. Woar zit t verrazzende in?
“Volgens mie zit t verrazzende in d’arrangementen en d’opbaauw van n aantal laidjes. Zo as k zee, is t meer n bandploat worden. Dat betaikent dat t resultoat soms wat roeger is en messchain wat spannender uutpakt het. Mor wel wait, messchain vind elkenain t nait zo verrazzend, haha. Mien stem is geliek bleven en mien gitoarspeulen ook, dus joa zeg t mor.”
Mit ‘Mien Dörp’ hest goud aanhoakt bie de verkaizen ‘Het Leukste Dorp Van Groningen’, t populaire zummerpergram van Noord. Dat het die al de daarde nummer 1-hit aanbrocht. Is dat n beetje commercieel denken van die?
“Mien Dörp’ heb k schreven kört noa t verschienen van ‘As Ik De Kaans Zol Kriegen’. Was destieds beïnvloud deur t dörpse leven en ook deur t pergram ‘Het Leukste dorp Van Groningen 2011’. Dou wos k nait datter in 2013 n nije oaflevern kommen zol; k wol t laid gewoon opnemen veur mien nije spaigelploat. Mor dou wol RTV Noord dit joar n nije oaflevern van HLDVG moaken en hebben wie contact had over mien laidje “Mien Dörp” en dat dat n goie combinoatie wezen zol. Messchain wel n beetje commercieel, mor aan d’aandere kaant mot dat ook wel as zukse kaansen veurbie kommen. k Schrief mien laidjes om zie te dailen mit de rest van Grunnen en da’s mit dizze single goud lukt, dunkt mie.”
Hest al n schier riegje Grunnegstoalege hits op dien noam. Dien meziek vaalt bie ons in de smoak. Krigst bie optredens vervast ook voak goie reaksies. Wat zeggen lu den zo aal? “Mìnsen hebben verschillende associoaties bie teksten. Netuurlek is ‘As Ik De Kaans Zol Kriegen’ n favoriet. Ain van de maist indrokwekkende reaksies was dat t laid op n cremoatie speuld is. Dij mevraauw had t laid zulf aanvroagd bie femilie. Dat dee mie wel wat. ‘Haarfst In Mien Haart’ is ook zo’n laid dat wat mit mìnsen dut. Loatst kwam der n Joegosloavië-veteroan noar mie tou. Hai was roakt deur de tekst van t vervremd vuilen in joen omgeven en nait waten wat te doun en zukswat. Hai haar dat ervoaren dou hai thuus kommen was van zien uutzenden. k Vin dat biezunder.”
Doe bist geboren in t Nedersaksische dail van Vraislaand, opgruid op Drìnte en as oetwozzen kirrel deelstreken in Grunnen. Bist dus nait groot worden mit de Grunneger toal, moar bist der wel mit aan d’loop goan. Hou biezunder is dat? “k Wait nait of t biezunder is; veur mie vuilt t nait echt zo. t Grunnegs vin k prachteg, kin mien gevuil der goud in kwiet. Heb mie vrouger nooit in t Weststellingwaarfs of in t Drìnts verdaipt. Dou k echt mit laidjesschrieven aan d’loop gong, woonde k aal in Pekel. Eerst schreef k in t Engels en nou dus ook in t Grunnegs. Veur mie vuilt t wel normoal, aal mot k der traauwens wel even bie zeggen dat t schrieven en t zingen mie beter oafgoan as t proaten. Dat vin k nog wel stoer oaf n tou.”
Laidjes schrieven in t Grunnegers of in t Engels, zit doar veur die nog verschil in? Den denk ik bv. aan t gevuil, d’onderwaarpen, bronnen van inspiroatsie ……
“Joa, der zit wel wát verschil in, mor nait hail veul. k Hol der wel rekenschap mit as k in t Engels schrief dat t veur Taneytown is. In t Grunnegs kin k wat persoonlieker schrieven, omdat dat veur miezulf is. d’Onderwaarpen verschillen nait echt, mor t zit hom meer in hou k t onderwaarp benoader wat t verschil moakt, zeg mor.”
Op t nije album stoan drij covers, zo as aine van Steve Earle. Zien ‘Someday’, hait bie die ‘Op n dag’. Is t stoer om n nije tekst te schrieven dij recht dut aan t orizineel en doarbie veur dien aigen pebliek aansprekend is? “De thema’s woar k geern over schrief binnen oardeg universeel dunkt mie. Mit dat laid van Steve Earle is dat net zo. De strekking van t verhoal is t zulfde bleven. k Hoop dat t aansprekend is veur Grunnegers. t Laid gait over n Pekelder jong dij aal mit n 2-0 achterstaand op de wereld kommen is. Hai dreumt over zien toukomst n dadde der wat van mokken mot, mor hou wait e nog nait. In t Engels gait t over t zulfde mor din speult t in n Amerikoans dörp. k Bin veul in Amerikoa west n de problemen op t pladdelaand bin nait veul aans as hier. Doarnoast laint d’Amerikoanse meziek zich goud veur Grunneger teksten,
vin ik.”
Is Steve Earle ain van dien meziekoale helden of veurbeelden?
“Steve Earle is zekerwoar ain van mien meziekoale veurbeelden. t Is nait veur niks dat mien countryrock band Taneytown hait. Dat is noar n laid van hom. k Heb meer veurbeelden dij mie der tou brocht hebben om laidjes te schrieven. Bruce Springsteen vanzulf, mor ook Kris Kristofferson, Bob Seger, Tony Joe White, Chris Knight om mor n poar te nuimen. k Heb dichterbie huus ook veul bewondern veur Daniël Lohues, Harry Niehof, Bert Hadders, Jan Henk de Groot n Alex Vissering.”
Wat vinstoe goud aan dij artiesten?
“Dat is n combinoatie van verschillende factoren. Noatuurlek de teksten en de muziekstijl. Mor ook de stem, d’instrumenten dij bruukt worden en de sfeer dij de meziek van dij lu uutoademt. t Is nait zo da’k alles zönder meer goud vin wat zai uutbrocht hebben, mor t maiste wel.”
Wat is typerend veur dien meziek en veur die as meziekant? As k ain nummer uutkaizen mos om Edwin Jongedijk aan n luusteroar veur te stellen, welke zel dat den wezen?
“Typerend is denk k veuraal mien stem en messchain da’k Amerikoanze meziek moak mit Grunneger teksten. Der is ook aaltied wel n vleug melancholie te bespeuren in mien meziek en k schrief vanuut mien gevuil. k Kin nait goud zo mor n verhoal bedenken en dat opschrieven. t Komt aaltied aargens vot. Mor welk laid nou echt typerend veur mie is? Poeh! Dat wait k nait. k Vin t stoer om aine te nuimen. t Liekt mie dat aal dij nummers dij k zulf schreven heb en dij k nait van t Engels noar t Grunnegs bewaarkt heb, dat dij nummers typisch Jongediek binnen.”
Wastoe doar zegst – Amerikoanse meziek mit Grunneger teksten – zel meschain ook pebliek boeten de pervinzie aanspreken. Wat onderwaarpen aangaait zitst in elks gevaal nait slim ‘vast’ aan Grunnen. Zit der laandelke bekendhaid in veur die?
“Dat wait k nait. Huift veur mie ook nait echt, leuf k. Bin aal slim wies mit hou t nou gait. In 2014 stoan der wat schiere dingen aan te kommen en wie zain wel wat dizze nije spaigelploat doun gait. t Is wel zo dat k oaf en tou buuten Grunnen speul, mor nait zo veul.”
k Zag die in oktober bie de (F)luusterlaidjesveurstellen in Van Beresteyn, mit Jan Henk de Groot en Gerry Wolthof. Bist nou mit Alex Vissering en Jan Henk bie t pad as De Troebadoers. Zuiken de Grunneger artiesten nander aal voaker op, om soam te waarken of mit nander op te treden?
“Doar liekt t wel op. Bert en Harry (Hadders en Niehof, red.) hebben net zukswat doan en nou doun wie dat ook as De Troebadoers. t Is haartstikke mooi om dat mit mekoar te doun. Alex, Jan Henk en ik hebben dezulfde veurlaifde veur Amerikoanze meziek en doar heurst din ook t neudege van, noast ons aigen materioal van-
zulf.”
Zukse soamwaarkens kinnen allenneg moar goud wezen veur de Grunneger meziek, of nait? “Joa, vin k wel. t Moakt dat de zangers en laidjesschrievers braider kieken goan en mekoar beïnvlouden. k Vin t haarstikke schier om mit Alex en Jan Henk meziek te moaken. Doar krieg k veul energie van. En volgens mie is t veur de mìnsen dij kieken kommen ook wel mooi om zukse soamwaarkens te zain en te heuren.”
Edwin Jongedijk, daank veur dizze Droadproat. t Leste woord is aan die.
“k Bin wies mit dizze nije golf van Grunneger laidjesschrievers en k denk dat t haartstikke mooi veur laifhebbers van (Grunneger) streektoal meziek is dat der ook veul varioatie is. Op zich heb k nait te kloagen as t om opkomst van pebliek gait, mor k hoop dat wie t mit mekander veur mekoar kriegen om nog meer mìnsen noar optredens te trekken. Der is zoveul moois te zain, mor t is veur lu nait meer vanzulfsprekend om der op uut te goan. Zol mooi wezen as wie dat veur mekoar kriegen. t Is doarom ook belangriek datter initiatieven zo as Kreuze binnen. Streektoal motten wie mit mekander hoog hòllen. Verder bin k der trots op dat mien nije ploat ‘Mörn Is t Weer Licht’ t daglicht zain het en blief k mooi deurgoan mit optreden en t schrieven van nije laidjes.”
‘Mörn Is t Weer Licht’
Edwin Jongedijk
€ 14,99
Te koop bie o.a. Evelyn Novacek http://www.evelynnovacek.nl/
Edwin Jongedijk zien webstee: http://www.edwinjongedijk.nl/
Edwin Jongedijk op Facebook:
https://www.facebook.com/edwin.jongedijk
Edwin Jongedijk op Twitter: https://twitter.com/edwinjongedijk
Edwin Jongedijk op YouTube:
http://www.youtube.com/user/edwinjongedijk
