De Boksemknobe
In dörp, nait hail wied hier vandaon
Huil lest n doomnei n preek
Over de zending gong t in Aofrikao
En hou t daor ales leek.
Hei haolde uut van hebbiedaor:
Dei haidens wazzen lelk en kwaod,
Zai vratten nait aanders as menskevlais
En luipen naokend over straot.
En veuraan in de kerke zat
Mietje mit heur zussie en d’aolen,
En tou ze dat hèurde wol ze van schaomt
Heur haandjes veur d’ogen haolen.
En tou ze noa kerke naor huus tou gong
Tou zee ze tegen heur vaor:
“Wat doomnei zegd het van dei lu,
is dat waarachteg waor?”
“Hebben dei lu daor gain boksem aan,
En gain jaze of gain vest?”
En vaoder zee: “geleuf t maor,
De doomnei wait dat best!”
“As dei lu den niks draogen wicht”,
Zee Mietje tegen heur zussie.
“Waorum dut vaoder den altied
Ain buksemknobe in t bussie?”
Tekst Geert Teis
